Февралин нег шинәс авн пенсь өсх
Күч-көлснә пенсин кемжән дундлад февралин нег шинәс авн зурһан зун жирн тавн арслнгд өсх. Энүнә тускар ирлцнһү тогтавр Әрәсән правительствин ахлач Дмитрий Медведев давсн баснг өдр батлж авв. Пенсин өслт инфляцин кемжәнәс иштә правительств тоолж һарһх. Росстатын то-дигәр давсн жилд энүнә кемжән зурһан дундур процент тогтав. Эн немлтин хөөн күч-көлснә пенсин дунд кемжән мана танһчд арвн негн минһн дөрвн зун арслнг тогтах.
Әрәсән закаһар насна күч-көлснә, инвалиду улсин күч —көлснә болн авалян геесн өрк-бүлмүдин күч —көлснә пенсин даатхлһна әнгин кемжән өсх. Иим өслт хот-хоолын, эд-таврин үн өсснәс болн жалвин дунд кемжән икдснәс иштә болжана. Эн жил Әрәсәд күч-көлснә пенсь хойр дәкж икдх. Февралин нег шинәс авн давсн жилин хот-хоолын болн эд-таврин үн өсснәс көлтә күч-көлснә пенсь зурһан дундур процентд өсх. Насна күч-көлснә пенсин дунду кемжән мана танһчд арвн негн минһн дөрвн зун арслнг тогтах.
Элст балһсна пенсионн сангин заллтин ахлачин дарук Людмила Сариеван келсәр, Элст балһсна Пенсионн сангин көдләчнр февралин нег шинәс авн пенсь икдүлһнә төлә цуг кергтә көдлмш күцәжәнә. Дундлад пенисонермуд зурһан зун һар арслнг немр мөнг авч чадх.
Күч-көлснә пенсин хойрдгч өслт эн жилин апрелин нег шинд болх. Эн кемд нурһлж инвалидмудын, дәәнә орлцачнрин болн чернобыльцнрин государственн пенсин кемжән икдх. Күч-көлснә пенсин туск федерадбн заканд сольвр орулгдснас иштә нилх бичкдүдиг хәләжәх цагин болзг икдв. Ода күч-көлснә стажд һурвн жилин ормд дөрвн дундур жил тоолгдх.
Элст балһсна пенсионн сангин заллтин ахлачин дарук Людмила Сариеван келсәр, эн закаһар зун найн негн күүнд пенсьнь жирн негн арслнг өсв.
Эн жилин туршарт Әрәсән улсиг пенсяр тетклһнә хамгин бичкн кемжән мана регионд бәәх пенсионермудын бәәдл-жирһлин хамгин бичкн кемжәнәс баһ болшго. Кемр көдлмш уга бәәх пенсионерин пенсь болн талджан чигн дөнцл мөнгнә кемжән бәәдл-жирһлин хамгин бичкн кемжәнәс баһ болхла, энүнд социальн немр мөнгн өггдх зөвтә.
Элст балһсна пенсионн сангин заллтин ахлачин дарук Людмила Сариеван келсәр, Хальмг танһчин давсн жилин сентябрь сард батлж авсн закаһар бәәдл-жирһлин хамгин бичкн кемжән хойр минһн арвн дөрвдгч жилд зурһан минһн тәвн һурвн арслнг тогтажана. Эн жилин январин нег шинәс авн эн тогтавр тоод авад, федеральн болн социальн дөнцл мөнгн шинәс тоолж һарһгджана. Коммунальн туслжмин тавн минһн арслнг социальн харслһна әнг немж өгчәнә. Күч-көлснә пенсь өсх, федеарльн социальн дөнцл мөнгн бас шинәс тоолж өггдх.
Хальмгин Пенсионн сангин то-дигәр мана танһчд февралин нег шинд хөрн дөрвн минһн пенсионерт пенсь немгдж тоолгдж өггдхмн. Дәкәд һурвн минһн күүнд пенсьнь эн жилин апрель сарас авн икдүлгдх.
Елена Алексенко, Котина Валерий
