Хаалһин зокал эвдсн жолачнр чанһ засгла харһулгдх

Жолачнрин төлә нуль промиле туск кемжә уга келһнә тускар Әрәсән президент Владимир Путин зака батлж авв. Ода шин закаһар литр кииләд һарһсн нег литр кииһәс этилин спиртын 0, 16 миллиграмм бәәх зөвтә. Тер мет шин закаһар соктуһар маши залсн улс болн ьалдан чигн хаалһсин зокал эвдсн жолачнр чанһ засгла харһулгдх. Түрүн болх соктуһар маши залж йовсн күн бәргдхлә һучн минһн арслнг ял өгх, хойр жилдән маши залдг зөв геех.

Экспедитор Андрей Басанов тавн жилдән жолач болж көдлжәнә. Көдлмшин кергәр талдан регионмудт одх кергтә болна. Соктуһар маши залхш. Андрейин тоолврар, сокту жолач олн улст ик әәмшг учрана.

Андрей Басановин келсәр, соктуһар маши залхд йир әәмшгтә. Тегәд эн туст зака чанһах кергтә. Квас уусн жолачнр бас әәмшг учрана.

Әрәсән президентин батлж авсн закан эн жилин сентябрин нег шинәс авн үүлдврт орх. Шин закаһар ГИББД-н инспектормуд медицинск шинжлтд литр этилин спиртын кииләд һарһсн 0, 16 миллиграммас ик кемжән үзүлсн жолачнриг йовулх. Эннь 0, ЗЗ промилле тогтажан Тер бийнь ода маши залсн кемд әрк ууж болшго. Кемр маши залач әкр эс уусн болхла, алкометр прибор 0 кемжә үзүлх. 0, 16 промиле гисн то зөвәр зүткәтә кемжән. Специалистнрин келсәр, промиле кемжән уусн әркин кемжәнәс залһлдата биш. Тер мет эн кемжән жолач болһнас, жолачин наснас ирлцнә.

Танһчин наркодиспансерин әнгин һардач Кермн Яванкееван келсәр, урдк жилмүдт иим кемжән орулгдла. Зуг ноль кемжән эвтә бәәсмн. Әрәсә нарта-делкән орн-нутгудас иим кемжә орулж авч.

Медицинск шинжлтд эс орх саната жолач һучн минһн арслнг ял өгх зөвтә, тер мет маши залдг зөвиг хойр жилдән геех. Кемр эмчнрин шинжлдт маши залдг зөвин цаас уга күүнд арвн — арвн тавн хонгт административн бәрәнд бәргдх закан бәәнә. Дәкәд болхла президентин батлж авсн закаһар соктуһар маши залсн күн чаню засгла харһулгдх, тер мет талдан чигн хаалһин зокал эвдсн жолачнр бас чанһ засгла харһулгдхмн. Түрүн болж зокал эвдсн жолачнр һучн минһн арслнг ялд унх болн хйор жилдән маши залх зөвән геех.

Кемр кесг дәкж хаалһин зокал эвдхлә, жолачнр тәвн минһн арслнг ял өгхмн, һурвн жилдән маши залдг зөвән геехмн. Әрәсән президентин батлж авсн зака чик. Сокту жолачнр ик әәмшг хаалһ учрана. Иим жолачнрас көлтә бичкдү болн бөдүн улс зеткртә йовдлд тусна. Иим закан чик. Хаалһд учрдг зеткртә йовдлмудын то баһрх.

Ода шин закана тускар маши залачнр болн йовһн улс зүткж, ухан тоолвран медүлжәнә. Эднә тоолврар, промилле кемжән ик чинр зүүжәхш, улсин әәмшг уга бәәлһн хамгин һол төр болжана. Шин закан үүлдврт орлт хойр сар үлдв.

Елена Алексенко, Очра Сергей, Ирчин Алексей