Эрмдгтә улсин өрк-бүлмүдәс тогтсн балһсна ассоциацин шунмһа орлцачнр алдр төрскән харсгч дәәнә ветеранмудыг йөрәв

Эрмдгтә улсин өрк-бүлмүдәс тогтсн балһсна ассоциацин шунмһа орлцачнр эн өдрмүдт акц давулад, алдр төрскән харсгч дәәнә болн тылын ветеранмудыг йөрәв. Эдн харһад, белгәд белгләд, бүлән үгән нерәдв. Келхд, тиим керг-үүлдврмүд эдн зуг байрин өдрмүдлә биш, йириндән чигн давулна.

Бова Манцаева арвн һурвн насас авн көдлж йовла. Тылын көдләчнрлә хамдан фронтд дәәлдж йовсн уост хувц-хунр уйяд, өөмсн, беелә өлгж йовла. тегәд өрк-бүлән тежәдг бәәсмн. Сиврт туугдсн цагт эктә болн хойр дү күүктә бәәсмн. Күнд көдлмш күцәһәд, кесг зовлн дааж һарв. Бова Мушаевна 7 жилдән шахтд көдлдг билә. 45гч жилин май сариг йисиг ода күртл тодлна.

Күч-көлснә ветеран Бова Манцаеван келсәр, диилврин тускар сонсчкад, цуг әмтн шахтаһас һарад, нег-негәд йөрәһәд, ууляд, байрлв.

Харм төрхд, Сиврәс төрскн һазрур Бова һанцхарн ирв. Төрскн селәнд Бова тавн күүкдиг өскж йовсн белвсн залута таньлдв. Эн көвүд-күүкдиг Бова Мушаевна йоста аак болад өскв. Ода эн 18 ачнр-зеенртә болн 17 жич-зеенчртә. Эдн цугтан ээжиннь бахмж болжана. Элгн-садн талдан чигн әмтн ирхлә, энүнд йоста байр болна. Эрмдгтә улсин өрк-бүлмүдин олна организацин балһсна ассоциацин ахлач Владимир Мучаевиг хальмгин авьясар халун цәәһәр тосв.

Владимир Мучаевин келсәр, эднд спонсормуд нөкд болна. Ниицәнә гешүд кесг акц давулна. Зуг ода тиим акц давулхин төлә, волонтермуд дутчана.

Эн ассоциац түрүн жил үүлджәнә. Зуг эн ахр цагин болзгт энүнә гешүж эрмдгтә улст кесг дәкж нәр-наадн бүрдәв. Эндр өдр чигн эдн төрскән харсгч дәәнә ветеранмудла харһад, эднлә күр-күүндвр кеһәд, онц оньг тусхав.

Татьяна Дмитриеван, Хулхачи Николай