Элст балһснд бөкнрин марһан болв

Элст балһснд давсн амрлһна өдрмүдт спортын күнтә мастер Тул Балдашиновин санлд нерәдгдсн цугәрәсән арвн нәәмдгч бөк бәрлдлһнә марһан болв. Энүнд Өмн үзгин болн Ар Кавказин федеральн округсин уйн наста спортсменмүд дииләчән йилһв.

Арвн һурвн-арвн тавн наста көвүд хойр өдртән Элст балһснд болсн марһанд арвн тавн чиннүрин категорьт ноолдад, диилвр бәрхәр зүткв. Греко-римск янзар бөк бәрлдлһнә марһанд Дагестанас, Чечняһас, Волгоградас, Росто-наДону, Әәдрхнәс болн Ставрополя зун жирн тавн бөк ирж дөрлдв.

Марһана ах зарһч Пүрвә Текеевин келсәр, дөрлдәнд хамгин бичкн бөкнр ноолдсн бийнь, дөрлдән йир зүткәтә болн соньн болв. Бичкн көвүд цуг-арһ чидлән агсж, диилвр бәрхәр зүткв. Иим бөкнр иргчдән сән күцәмж бәрж чадх.

Энүнд орлцсн көвүд олн-зүсн спортивн школмудын элчнр. Тегәд чигн эднә ноолдаг хәләхд соньн болв. Һучн хойр килограммин чиннүрт Ставрполь балһсна элч Гаджи Кодиев диилвр бәрв. Эн көвүн түрүн орм эзлх гиж специалистнр нәәлжәсмн. Урднь ноябрь сард Южно-сахалинск балһснд эврәннь чиннүртән Әрәсән чемпиона нер зүүв. Тәвн нәәмн килограммин чиннүрт эн жилин Өмн үзгин федеральн округин чемпион Балдашиновин нертә бөк бәрлдлһнә академин сурһульч Эрдни Марчеловин болн Грозный балһсна бөк Тамерлан Магомедовин хоорнд болсн ноолдан йир соньн болн зүткәтә болв. Ноолдана сүл секундт гиич халмьгин бөкин һариг бәрж авад, хайж чадв. Специалистнрин келсәр, греко-римск янзар бөк бәрлдлһнд шин зокал оурлгдсн шин эв-арһ бөкнрт өгчәнә.

Нарта делкән категорин зарһч Василий Волковин келсәр, греко-римск янзар бөк бәрлдлһнд орулгдчн шин зокалыг бөкнр олз-тустаһар олзлад, эврәннь билгән болн чадмган мелүж чадх. Шин зокал бөкнрт тас талдан эв-арһ олзлж ноолдх арһ өгчәнә.

Эн саам Хальг танһчин бөкнр тавн медаль шүүж авв. Эннь Сарнг Каруев, Азиз Джимбетов, Даниил Андросов, Мингиян Нимкеев болн Илья Дубровин. Марһана ашар сән үзмж бәрсн бөкнр мергжлтин кемжәһән өөдлүләд, дарани спортивн разряд авв.

Хавтхна Элла, Котина Валерий