Цергт эс церглсн көвүд государственн көдлмшт орж чадшго

Цергәс зулсн көвүд государственн церглтин көдлмшт орж чадшго. Эн жилин январин нег шинәс авн цергт эс церглсн улс государственн гражданск церглтин көдлшмт орулж авгдшго. Ода цергә билет угаһар көдлжәх улсиг көдлмшәснь һарһх закан бәәнә.

Цергәс зулсн көвүдин цергә билетд эн жилин январин нег шинәс авн цергәс зулад гүүв гисн бичвр кегдх. Тегәд иим улс государственн церглтин көдлмшт орж чадшго. Танһчин цергә комиссариатын һардачнрин тоолврар, давсн намрар цергт мордх цаас эс авсн улс хаврар ирәд, цергт мордх арһ бәәнә. Шин закан цергт церглһнә чинриг өөдлүлхин төлә батлж авгдв. Әрәсән Әәрмд баһчуд дурлж церглхин төлә иим шин закана һол күцлнь болв.

Танһчин цергә комиссариатын әнгин ахлачин дарук Николай Ванькаевин келсәр, эн төрәр келхлә, прдеприятин һардач эврән шиидвр авх зөвтә. Шишлнг сурһуль сурсн улс цергт мордшго, тер тоод МЧС-и МВД-н, наркоконтролин заллтин көдләчнр хөрн долан нас күртл цергт мордшго закан бәәнә.

Цергәс зулжах улсин то мана танһчд өсәд йовна. Региональн цергә комиссариатын то-дигәр, хойр минһн арвн һурвдгч жилин намрин цергт мордлһна кемд һурвн зун күн хәәврт бәәв. Эднә тускар уголовн керг күцәгдсн уга. Давсн жилин октябрь-декабрь сармудт тавн зун жирн негн күн цергт мордв. Эннь хаврин кемлә дүнцүлхлә ик болжана. Негдгч курсын оют Александр ямаран цергт церглхән ода деерән меджәхш. Көвүнә тоолврар, төрскндән даалһвран өгх кергтә.

Оют Александрин келсәр, цергт церглх дурн бәәнә. Сурһулян төгсәчкәд цергт мордх зурата.

Шин закана тускар баһ наста көвүдин тоолвр әдл биш болж һарв. Зәрм баһючудын тоолврар, цергт эрк биш церглх керг уга. Зуг эднә ик зунь цергт мордх саната. Цергт церглсн нег жил эднә жирһлин хаалһд туслх гиж эдн тоолжана.

Эн көвүнә келсәр, цергт церглх саната улс церглтхә, энүнд цергт мордх керг уга. Цергт церглх дурн бәәнә гиж эн көвүн келв. Бурятьд церглсн бәәж. Ода көдлмшт МЧС-т орх саната. Әәрмд церглснь нөкд болжана гиэ эн күн келнә. Цуг көвүд цергт церглх зөвтә. Залу күн цергч күн болх зөвтә гиж эн залу күн келнә.

Эврәннь иргчин тускар ухалх кергтә гисн неквр шин закан тәвжәнә. Тегәд эдн чик шиидвр авх зөвтә.

Ээнән Делгр, Ирчин Алексей