Царцахала ноолда кедг шин техник Хальмгт ирв
Хальмг танһчд царцахала ноолда келһн нег минһн зун һучн зурһан минһн гектарт кегдв. Ода эн хортн альдарн нисжәхин тускар шинжлт нотмтнр кежәнә. Те царцахаг хордлһна көдлмш цаарандан кегджәнә. Октябрьск районд энүнә төлә самолет олзлв. Иим көдлмш кехин төлә района бюджетас мөнгн йилһж өггджәнә. Тер мет федеральн мөнгн бас сән нилсән күргжәнә.
Царцахала ноолда кедг өдгә цагин некврлә ирлцәтә техник невчк оратад мана танһчд ирв. Иим кергтә оборудовань зуг хойр хонг хооран ирж. Юнгад гихлә ода царцаха нисәд һарч одв гиж специалистнр келнә. Тегәд альд болн кезә хортн нисж ирхин тускар медж болшго. Болв иргч жилин май сарас авн иим һурвн күчтә агрегат Лаганск, Октябрьск, Хар Һазра болн Үстин райодт көдлхмн.
Энүг Казаньсельхозмаш предприятьд кеж һарһж. Агрегат болһн һучн сай арслнг күрчәнә. Ода болхла сән шин техник селәнә эдл-ахун аһуд талдан көдлмш кежәнә. Эн өдрүмдт Адуч нертә крестьянск-фермерск эдл-ахун тәрәнә һазрт эднә нилчәр хорт аөснлә ноолдан кегджәнә. Россельхозцентр нертә Хальмгин филиалын һардач Александр Кекешкеевин келсәр, ода иим техник буудян урһцд болн тутрһд хорлт күрдг хортнла ноолда кеж чадх. Эн керг урһцд олз-туста болн.
Иим машидын плуг хөрн дөрвн метр һазрт хор цацж чадна. Баср нертә агрегат нег частан һучн-дөчн дуунад йовад, өдртән һучн гектар һазрт көдлмш күцәж чаджана. Иим машидт хорыг һарарн зуурх керг уга. Ут-тоодан нег машин хойр зун лиитр хорта ус цацна. Машина кабинд бәәх компьютерт иим агрегатд көдлж чадх дөрвн көләч цуг кергтә программ орулна. Россельхозцентрин ах инженер Александр Шамраевин келсәр, иим машидын кабинд кондиционер, компьютер, навинатор бәәнә. Цуг көдлмшиг компьютер зална.
Апрель сарас авн август сар күртл иим мобильн отряд көдләд, цуг селәнә эдл-ахун кергтә көдлмш кеж чадхмн. Хальмгин тәрәчнр шин техникд икәр нәәлжәнә. Хальмгин селәнә эдл-ахун министерствин әнгин ахлач Николай Очировин келсәр, иим машид күрч чадшго һазрт, самолет ирж көдлнә. Тер мет талдан чигн эв-арһ олзлгдна. Тегәд танһчин ар зүгин райодт тогтсн күнд бәәдлиг иим агрегатмудын нилчәр халһх санатавидн. Цувгин өөр тутрһ урһжах һазрт болхла авиац кергтә эс гиж вентилятормуд олзлгдна.
Иим мобильн отрядмуд ода Оренбургск, Белгородск, Волгоградск областьмудт, Кубаньд, Ставропольд болн Татарстанд көдлжәнә. Адуч нертә фермерск эдл-ахун хөөн, иим техник Рассвет нертә СПК, Агронива эдл-аху Урожай нертх крестьянск эдл-аху болн Степной САК нәәмәдлж авхмн.
Хавтхна Элла, Бадмаран Владислав
