Баһчудын керг-үүлдврмүдин аш диглгдв
“Время действовать” нертә керг-үүлдвр төгсв. Танһчин спортын, туризмин болн баһчудын политикин министерствд танһчин керг-үүлдврин аш диглв. Энүнә һол күцлнь — эрүл-дорул кевәр бәәлһнә бәәдл-жирһл тархалһн, баһчудыг олна үүлдврт орулһн болжана.
Баһчудын керг-үүлдвр июнин арвн хойрас авн июлин арвн хойр күртл болв. Эн цагин эргцд спортивн олн-зүсн керг-үүлдврмүд бүрдәж давулгдв. Будь здоров нертә спортын байрт хамгин олн баһчуд орлцв. Энүнд көвүд-күүкд спортивн марһаст дииләчән йилһв. Баһ наста өрк-бүлмүд болхла Парад колясок нертә марһанд орлцв. Иим керг-үүлдврин һол күцлнь — өрк-бүлин чинринь үзүлһн болн өрк-бүлмүд бат бәәхин төлә иим керг кегджәнә. Дәкәд болхла нег сара керг-үүлдврин программар “Мы —граждане России” нертә керг-үүлдвр бүрдәгдв. Эн болн талдан чигн олн-зүсн керг-үүлдврмүдин аш танһчин спортын, туризмин болн баһчудын политикин министерствд диглгдв.
Хальмгин спортын, теризмин болн баһчудын политикин министр Александр Гедерим келсәр, иим нег сара керг-үүлдвр үзүлвр биш. Баһчуд дангин олн-зүсн керг-үүлдврт орлцна. Өдгә цагин көвүд-күүкд цугтан гражданск хәләцтә.
Энүнә хөөн дииләчнриг ачлв, района специалистнрин төлә семинар бүрдәгдв. Лучшач программа нертә номинацд Адьян Болдырев түрүн орм эзлв. Энүнд үнтә белг ноутбук бәрүлж өггдв. Дииләчин темдглсәр, сурулин кемд им керг-үүлдврмүдт шунмһа кевәр орлцв. Ода Адьян Үстин района сойлын, баһчудын политикин болн спортын секцд ах специалист болж көдлжәнә.
Адьян Болдыревин келсәр, мана керг-үүлдврт хамгин һол төрнь — баһчудыг соньмсулх кергтә. Эдн эврән иим кергт орлцсн деерән, өөрхн улсан элгн-садан дахулж ирх зөвтә.
“Время действовать” нертә баһчудын керг-үүлдвр төгсв. иргч жилд шин ухан-санан күцгдх, сонбн седвәр орулж өггдх. Иим керг-үүлдврт баһчуд шунмһа кевәр орлцад, олз-туста үүлдвр күцәх.
Ээнән Делгр, Бадмаран Владислав
