Баһ Дөрвдт тоосхин шин завод тосхгджана
Баһ Дөрвдә районд тоосхин шин заводын тосхлт төгсжәнә. Эннь танһчин хамгин ик промышленн төсв болжана. Шин предприять жилдән арвн тавн сай тоосх кеж һарһхмн. Эн жилин намрар завод түрүн продукцан экләд һарһх.
Тоосхин заводын тосхлтд сүл дәкж Хальмг танһчин толһач Алексей Орлов давсн жилин ноябрь сард ирсн билә. Тер цагас авн энд көдлмш делгрлт авчана. Шин заводын гер тосхгдв. Ода энүнә дотр оборудовань углж тәвлһнә көдлмш кегджәнә. Бешмүд көдлхдән белн болв. Тосхлт күцәжәх инвестиционн компаня элчнрин иткүлсәр, эн жилин намрар тоосхин завод түрүн продукц кеж һарһж чадх.
Заводын директор Юрий Убушиевин келсәр, цуг кергтә оборудовань хулдж авгдв. Ода зуг тосхлтын көдлмш кех кергтә. Ростов балһснас специалистнр ирәд бүртклһ кех. Энүнә хөөн түрүн тоосх кеж чадхвидн.
Тоосхин шин завод бәрх санан правительствин гешүдт хойр жил хооран орсмн. Энүнә төлә найдгч жилмүдт төмр бетон кегдлмүдин предприятин корпус экләд тосхгдсн плошадк олзлх шиидвр авгдв. Йирдчг жилмүдт эс тосхгджах обьектмудыг хамхлад, тоосхинь хулха авч. Ода энүнә ормд шин тоосхин завод бәргдв. Иим төсв күцәхин төлә танһчин һардвр тосхлтын хамгин ик компань оурлж авв. Эн компаняь мана регионд тосхлтын халхиг делгрүлх саната бәәнә.
Инвестиционн компаня һардач Владимир Мацаковин келсәр, ода мана танчһд тосхлт делгрлт авчана. Әмтн бәәдг гермүд бәрх кергтә. Тегәд эврә кимд тосхлтын материал кех төр тәвгджәнә. Ода цуг материалмуд нурһлж талын һазрас авч иржәнә. Энүнәс көлтә гермүд үнтә болна. Эннь мана танһчд му болжана.
Шин заводт тоосхиг бәәрн материалмуд олзлж кех зура бәәнә. Эннь бас ик чинртә керг. Сән чинртә шавриг болн элсиг Баһ Дөрвд селәнә өөр бәәх Тундутово селәнә аһуд һарһж авх санан бәәнә. Энүнә төлә цуг кергтә техник бәәнә. Ода зуг асфальтированн хаалһ татх төр хаһлх кергтә.
Владимир Мацаковин келсәр, элснә болн шаврин карьер олзлх бооца батлж авгдла. Энүнд хөрн жилдән күрх шавр болн элсн бәәнә. Баһ Дөрвдә района ахлач Геннайди Золочевский келсәр, Тундутово селәнә өөр бәәх шавр болн элсн Өмн үзгин федеральн округд хамгин сән чинртә.
Производствен төрмүдлә зерг заводын һардачнр ода көдләчнрин төр бас хаһлжана. Ода шин заводын тосхлтд тәвн күн көдлжәнә. Шин предприять экләд эдлврт орхла энд зун тәвн көдләч кергтә болх. Района бәәрн улсиг көдлмшт авх гиж Баһ Дөрвдә района ахлачнр нәәлжәнә.
Баһ Дөрвдә района муниципальн бүрдәцин администрацин толһач Геннадий Золочевский келсәр, завод экләд көдлхлә, тосхлт сәәнәр кегдх. Давсн жилд һучн тавн күн һазрин участк авла. Ода әмтн экләд гермүд тосхжана. Эдн шин заводын тоосх күләжәнә. Тер мет алвн орж ирх.
Тоосхин заводын тосхлтын йовудын тускар Хальмг танһчин толһач Алексей Орлов иигж келв. Хальгин толһач Алексей Орловин келсәр, Хальмг танһчин туужд түрүн болж иим ик завод тосхгджана. Арвн тавн сай тоосх жилдән кегдх. Нег үлү сән чинртә тоосх кегдхмн. Мана продукц Өмн үзгин округд болн Әрәсәд хамгин сән болх. Ода заводын тосхлтын йовуд сән. Намрар энд түрүн тоосх кеж һарһх зөвтә.
Чучян Валентина, Бадмаран Владислав
