Танһчин бөкнр Анапа балһснд болсн марһанд хөрн тавн медаль шүүж авв
Краснодарск крайд уйн наста спортсменмүд дунд болсн дорд үзгин эв-арһар бөк бәрлдлһнә цугәрәсән марһанас Элст балһсна элчнр хөрн тавн медаль шүүж авч ирв. Мана танһчин спортменмүд декабрь сард Москва балһснд болх Әрәсән дорлдәнд орлцх. Эндр өдрәс авн эдн марһанд белдвр кежәнә.
Марһана ашар хальмг танһчин команд Әрәсән хамгин сән гисн командсин тоод орв. Ут-тоодан мана уйн наста бөкнр арвн алтн, нәәмн цаһан мөнгн болн долан күрл мөнгн медальмуд шүүж авч чадв. Дөрлдәнд Әрәсән болн СНГ-н жирн тавн регионас тавн минһн спортсмен ирж орлцв. Күсдундур сай улс бәәх регионмудын әнгд мана танһчин спортсменмүд кубокар ачлгдв. Әрәсән цергә эрдмин бөк бәрлдлһнә хальмгин әнгин күцәгч директор Олег Куберлиновин келсәр, хальмг танһчд сән спортсменмүд бәәхинь эн марһан герчлв. Эдн әрәсән болн нарта-делкән чинртә марһаст хальмг танһчин нер харсж чадхмн.
Цергә эрдмин бөк бәрлдлһнә уйн наста спортсменмүдин цугәрәсән наадн, тренерин келсәр, олн көвдү-күүкдт иргч дөрлдәнд диилвр бәрхд сән дамшлт өгв. Эрднь Бембеев вовинам-вьет-во-дао эв-арһар тавн жилдән көдлжәнә. Эн жилмүдин эргцд цугәрәсән болн региональн дөрлдәнд орцлв. Иим ик чинртә марһанд Эрднь түрүн болж орцлжана. Энүнә ашт арвн негн наста бөк зуг Москван элчд диилгдв. Шүүгдсн бйинь, Эрднь дегд икәр һундлго, цаарандан чигн дамшлтан өөдлүлх саната. Эрднь Бемьеевин келсәр, нанд иим кеәвр бөк бәрлдлһн таасгджана. Түрүн болж секцд ирсән ода күртл сәәнәр толднав. Сул цагтан футболын ормд нааран ирәд дамшлтан өөдлүлжәнәв. Бакур Абушиновин келсәр, вовинам вьет-во-дао эв-арһ күүнд чанһ-чиирг болхд туслна, бийән харсхд олз-туста болна.
Вовинам вьет во дао марһанл шүүж авсн медаляр Элст балһсна элчнр нүүрлчг орм эзлв. ут-утрштан уйн наста спортсменмүд һучн зурһан бөк бәрлдлһнә эв-арһар дөрлдәд, нәәмн зун һучн йисн медаль онц болн командн дөрлдәнд шүүж авв. Эднә келсәр, ода төвкнх болн санамрдх керг уга. Удл уга эдн дәкәд чигн ик чинртә марһанд чидлән сөрх. Декабрь сард хальмг танһчин команд Москвад болх Әрәсән чемпионатд орлцхмн.
Санкун Кермн, Дукмана Николай
