Сурһульчнрин дунд наркотик олзлһна тускар шинжлт кегдх
Наркотикуд олзлһиг эрт илткж авлһна төлә шин федеральн закан үүлдвр орулгджана. Энүнә төлә школмудт, дунд эрдмин сурһулин заведеньст, деед сурһульд сурһульчнрин болн оютнрин гетлүлгч эмчин хәләвр болн эврә дурар социальн-психологическ шинжлт орулгджана. Иим заканла бичкдүд болн эднә эк-эцкнр зөвшәржәну аль угай? Дорас өсж йовх баһчуд дунд наркотикуд олзлһна төр иим кевәр хаһлж болхий аль угай?
Арвдгч классин сурһульч Анастасия Моргунован тоолврар, иим шинжлт кергтә. Ода эднә класст наркоманмуд уга.
Орсин келн-улсин гимназин арвдгч классин сурһульчнр наркотикуд олзлһна тускар кегдх шинжлтыг дөннжәнә. Эднә тоолврар, эднә класст болн көвүд-күүкдин таньдг-үзлин дунд наркоманмуд уга. Зуг насни дигт күрәд уга бичкддүин кергүдин инспекцин то-диг тас талдан бәәдл үзүлжәнә.
Насни дигт күрәд уга бичкдүдинкомиссин көдләч Адьян Бадмаевин келсәр, сүл сармудт бичкдүд наркотикуд олзлсн дөрвн йовдл илткгдв. Ут-тоодан иим йовдлмудын то өсәд йовна. Ставропольск крайд бөдун улс олсн өвс цуглулжасн бәргдж. Тедн дунд Хальмг танһчин бичкдүд бас йовж.
Бичкдүдиг эврә дурар наркотикуд олзлһна шинжлтд орулһна декабрин тавнд батлж авсн закан ода көдлжәхш. Юнгад гихлә, күцәгч йосна федеральн органмуд иим шинжлт кех диг-дара батлж авад уга. Тер бийнь Әрәсән регионмудт иим шинжлт кех цагин неквр бәәнә. Сүл цагт наркотикуд олзлжах бичкдүдин то өсәд йовна. Нег минһн нәәмн зун хөрн дөрвн саглулгч тоод авгдсн көвүд-күүкдәс дөрвн зун арвн дөрвн күн наркоманмуд. Эднәс һурвн бичкдүд наркотикуд олзлжана.
Наркологическ диспансерин ах эмч Елена Бадмаеван келсәр, эмчнр иим шинжлт дөннжәнә. Иим кевәр наркотикуд олзлжах бичкдүдин то сәәнәр медгдх. Ода болхла зуг полицин көдләчнр авч ирсн көвүд-күүкдиг шинжлнә. Шинжлт болхла эн туск чик бәәдл медүлх.
Сүл цагт мана танһчд баһ тетквртә болн му таалд бәәх өрк-бүлмүдин то өсәд йовна. Нег жил хооран иим өрк-бүлин то жирн хойрт күрчәсмн. Ода болхла жирн йиснд өсв. Иим өрк-бүлин көвүд-күүкд наркотик олзлх әәмшгтә. Школмудт наркотикуд олзлһна болн зака эвдсн йовдлмудас саглулһна төрәр Элст балһснд танһчин цуг райодас специалистнр цуглрад күүндвр кев. Удл уга Городовиковск балһснд хазгудын кадетск корпус бүрдәгдх. Энүнд өнчн болн жирһлин күнд бәәдлд туссн өрк-бүлмүдәс зурһадгч болн доладгч классмудын көвүд орулж авгдх. Эннь насни дигт күрәд уга бичкдүдиг му авьясас харсж авлһна нег керг-үүлдвр болжана. Батлж авсн шин закан болхла эн төриг бүклднь хаһлх зурата. Багшнрин тоолврар эн хурц төриг ик кезәнәс авн хаһлх кергтә.
Орсин келн-улсин гимназин багш Светална Санджиеван келсәр, иим шинжлт өрк-бүлд болн школд сән ничлән күргх.
Гимназин туужин багш Александр Молаевин келсәр, иим шинжлтын хөөн көвүд-күүкдиг эрт илткж авад, энүнд дөн күргж болх. Сурһульчин эк Светлана Цеденован келсәр, иим шинжлт школмудт кергтә. Эннь сән керг.
Шинжлтд болн эмчнрин хәләврт бичкдүд зуг бичәд зөвшәл өгәд орх зөвтә. Арвн тавн нас күртл иим зөвшл эк эс гиж эцкнь өгх зөвтә. Арвн тавнас ах көвүд-күүкд иим зөвшлә эврән бичнә. Иим зөвшәл нуувчар өггднә. Харм төрхд, багшнр иим зака эвдәд, диг-дара эвдсн сурһульчиг олж авхар седнә.
Танһчин наркодиспансерин ах эмч Елена Бадмаеван келсәр, түрүн хәләцд көвүд-күүкдин иим бәәдлиг насни зангла әдлцүлж болх. Тегәд эндүршгон төләд шинжлтыг болһамжтаһар кех кергтә.
Дәкәд болхла иим гем эмнүлдг специалистнр мана регионд дутжана. Эндр өдр танһчин наркодиспансерт цуг кергтә эмчнрәс зуг жирн процентнь көдлжәнә. Яшкульск, Городовиковск болн Яшалтинск райодт психиатр-наркологуд уга. Тегәд чигн наркологудын хәләвр орх улсин то дала. Нег жилдән һурвн минһн шинжлт кегдх зөвтә, эн жилин йисн сарин эргцд болхла иим арвн һурвн дундур минһн шинжлт кегдв. Харм төрхд, ода эмч-наркологуд хамгин кергтә специалистнр гиж тоолгджана. Эннь цагин бәәдл дахжах йовдл болжана.
Хавтхна Элла, Максим Мятежный
