Соньн номин фестиваль Элстд болв

Элст балһснд соньн номин фестиваль болв. Хойр өдрин эргцд бөдун улс болн бичкдүд “Физическая кунсткамера” музейин һәәхүл өнгәр хәләж чадв, химическ нааднд орлцв, савң чандг дасв, талдан чигн соньн керг-үүлдврмүдт орлцв. Фестиваль Амр Санана нертә келн-улсин библиотект болв.

Һәәхүлд ирсн улс экспонатмуд хәләсн деерән, эдниг көдлмштнь шинжлж хәләв. Элст балһснд түрүн болж физическая кунсткамера музейин өвәрц һәәхүл көдлжәнә. Эдниг подмосковн Троицк номин балһснас авч ирж. Энүг хәләсн бичкдүд болн бөдун улс чигн икәр байрлв.

“Физическая кунсткамера” музейин һәәхүлин бүрдәһәч Анна Коневских келсәр, энд тәвгдсн һәәхүл эврәннь чинрәрн дамшлтын керг. Иим экспонатмуд дкәж талдан һазрт үзүлгдәд уга. Музейд олн-зүсн соньн экспонатмуд бәәнә. Тер тоод лампочксар йовлһн олн улсин ик оньг авлна. Энүнд электрическ лампочк авад, деернь йовна.

Элст балһсна улст үзлхин төлә хамгин соньн экспонатмуд шүүж авгдв. Фестивалин йовудт нааран ирнс улс савнг чандг эрдм дасж авв. Энүнә төлә савнгин ул, шир болн сән үнртә тосн олзлгдв.

Хөрн негдгч школын сурһульч Заяна Церенован келсәр, түрүн болж эврән савнг чанж үзв. Ода гертән хәрәд эктәһән хамдан савнг кеж үзх саната. Виолеттан келсәр, әмтн лампочксар йовснь өвәрц болв. Энүгәр йовхла лампочкс хамхрхш. Козлдур бас соньн. Нег колдур өмсхлә дор-деерк хойр сольгдж одна.

Тер мет фестивалин орлцачнр номин нуувч болгч элснәс зурн келһнә мастер-класст орлцв. Эннь өвәрц керг болж медгдв. Эгл сюжетмудыг цөн цагт туулин таалд орулж медүлнә. Иим кевәр зург зурлһн бичкдүдин үүдәгч билг-эрдм делгрүлнә.

Вера Сенникован келсәр, иим керг-үүлдвр кергтә болн олз-туста. Бичкдүд иим кевәр номин эрдмәр соньмсна. Иим керг-үүлдвриг сард нег дкәж кехлә әсн болх.

Фестивалин бүрдәһәч Светлана Горяеван келсәр, ода Элст балһснд олн-зүсн керг-үүлдврмүд, нәр — наадн бүрдәж давулгдна. Зуг номин халхар иим фестиваль болад уга.

Фестивалин бүрдәһәч Светлана Горяеван келсәр, энүнлә насарн цацу улс деед сурһульд сурад, эрдмтә улс болв. Эдн олн-зүсн халхар көдлжәнә. Бәәдл-жирһлин дамшлт хоршав. Тегәд эдн Элст балһснд ирәд, хоршасн дамшлтарн хувалцх саната.

Номин үүлдвр бас соньн болдг бәәсинь олн әмтн медж авв. Энүнд ирсн күн болһн, тер тоод бийән шинжләч гиж тоолв. Номин хаалһар йовхин төлә иим бичкн кергәс авн эклх кергтә.

Елена Алексенко, Бадмаран Владислав