Селәнә эдл-ахусд шанг дөн күргв
Танһчин селәнә эдл-ахус залһдан уга государственн дөн гиж тәвн долан сай арслнг авв. Иим мөнг буудя урһадг танһчин йисн район авсмн. Давсн жилд һан-халун болнас көлтә иим дөн күрггджәнә. Ут-тоодан мана танһчд энүнәс көлтә һурвн зун тәвн сай арслнг һару һарв. Ода хаврин тәрәнә көдлмш эклжәх цагт тәрәчнрт мөнгн күртжәхш.
Иван Жарков мана танһчд крестьянск-фермерск эдл-ахусин делрглтин ул тогтасна улсин негнь. Хөрн негн жилдән цаһан һуйрин буудя болн талдан чигн буудян зүүтә культурмуд урһалһна халхар көдләд, ода Сарпинск районд селәнә эдл-ахун халхин нүүрлгч көдләчин тоод орв. Сүл цагт көдлхд күнд болжана гиж Жарков келнә. Сүл жилмүдт зунын кемд догшн һан-халун болад, урһц үрәд, көдлмштнь ик һару һарчана.
Крестьянск-фермерск эдл-ахун толһач Иван Жарковин келсәр, ода техникин сольврин әнгс хулдж авдг арһуга. Тракторан һурвн жилдән ясж чаджахш. Иргчдән яһж көдлхән меджжәхш. Государств дөн эс күргхлә, фермермүд эврән цуг төрмүдиг хаһлж чадшго.
Ут-тоодан Сарпинск районд һучн һурвн минһн гектар буудян тәрәнә аһу үрв. Энүнәс көлтә йирн тавн сай арлснг һару һарч. Иим күнд цагт государствин халхас дөн күрглһнә эднд сән нөкд болх. Эн туст мөнгн кретьянск-фермерск эдл-ахусд болн СПК-ст йилһж өггджәнә. Сарпинск РМО-н АПК-н делгрлтин әнгин ахлач Виктор Чокаевин келсәр, шанг болн танһчин правительств цаглань дөн күргв. Районд долан сай арлснг ирв. Эн мөнгәр эдл-ахус машина тос-түлә хулдж авв, зәрм крестьянск фермерск эдл-ахус бүүдян эк хулдж авла. Шангас ирсн мөнгн селәнә эдл-ахусд хаврин тәрәнә көдлмш цаглань эклхд нөкд болв.
Эннь болхла Баһ Дөрвдә района “Плодовитое” СПК. Эдл-аху бат, сүл цагт делгрлт авчана. Болв энүнд зунын һан халун бас эврә му үлмәһән күргв. Эдл-аху энүнәс көлтә арвн сай арлснг геев. Тегәд государственн дөн гиж ирсн мөнгн өр данцалһнд болн алв өглһнд йовулгдв.
“Плодовитое” СПК-н толһач Юрий Искам келсәр, залһлдан уга государственн дөн ирснь сән нилчән күргв. Иим дөн олз-туста, эннь йоста түшг болв, эн мөнгн эдл-ахусд күрв.
Баһ Дөрвдә районд залһлдан уга государственн дөн авхин төлә нәәмн эдл-аху эрлһ орулж өгсн бәәж. Тер тоодж крестьянск фермерск эдл-ахус. Эдн ут-тоодан һурвн дундур сай арслнг авв.
Баһ Дөрвдә РМО-н АПК-н делгрлтин әнгин ах специалист Валерий Константиновин келсәр, шангас ирх зәрм мөнг авчкв. Ода авсн мөнгин эдл-ахус олзлжана. Хаврин тәрәнә көдлмш цаглань кегджәнә.
Танһчар бүклднь авад келхлә, давсн жилин һан-халунас көлтә һурчн зун тәвн сай арлснг һару һарв. Энүнәс көлтә эдл-ахусин өрн өсв, алвн цаглань өггдсн уга, эн жилин хаврар тәрәнә көдлмш кехин төлә мөнг уга болв. Тегәд тәрәчнрт хаһлх төрмүд дала. Тегәд государствас болн танһчин правительствас ирсн дөн дигтә цаглань кегдв. Түрүн авгтан тәвн долан сай арлснг йилһж өөгдв. Намрар дәкәд зун сай арслнг ирх зөвтә.
Эн өдрмүдт танһчин селәнә эдл-ахусд хаврин тәрәнә көдлмш гүргүдән. Намрар тәрсн тәрән сәәнәр үвлзв. Тегәд фермермүд эн жил сән урһц хураж авх саната. Государствин халхас йилһж өгнс мөнгиг эдн эзни кевәр олзлха, эдл-ахус цаарандан чигн делгрлт авх. Эн жил хур орад, тенгрин таал сән болх гиж тәрәчнр нәәлжәнә.
Елена Алексенко, Котина Валерий
