Март сард ик цасн орад әмтнд боомтг учрав
Үвл эврәннь зөвән геехәр седжәхш бәәдлтә. Давсн өдр элвгәр орсн цасн жолачнрт ик боомтг учрав. Элстин хаалһст олн машид зогсв. Хамгин олн автомобильмуд негдгч микрорайонд цуглрв. Хавр ирхлә зәрм жолачнр үвлин рези сольчксн бәәж. Тегәд эдн хальтрата хаалһар йовж чаджахш. Негдгч микрорайонд Камаз машина жолач залвран гееһәд, машид йовдг хаалһ бөглв. Энүнәс көлтә кесг дуунад машиж цуглрад йовж чадсн уга. Автокөлгн, нег үлү ик аца зөөдг машид кесг частан көндрж чадсн уга. Мана регионд ирсн циклонас көлтә элвгәр орсн цасн болн шүрүн салькн олн улст ик боомтг учрав. Хальмгин синоптикүдин цәәлһсәр, нег өдрин эргцд хур-цасн сара хонгин кемжәнәс жирн дөрвн процентнь орв. Эндр кесн то-дигәр Элст балһснд цасн өндртән арвн йисн сантиметрт орж, Троицкое селәнд цасн өндртән хөрн негн сантиметрт күрчәнә. Метеорологудын тааврар, иргч хойр өдр цасн-хур орх. Аһарин кемжән сөөднь нег градус киитн, өдртнь һурвн градус дулан болх.
