Мана танһчд зурһан агрокласс үүлджәнә
“Агроклассы как инновационный проект профильного образования”. Иим нерәдлһтә танһчин семинар Городовиковск района Кировск дундын школд болв. Энүнд эрдм-сурһулин учрежденьсин һардачнр, эрдм-сурһулин министерствин элчнр, РИПКРО-н, Хальмгин университетин номтнр болн мана региона агроклассмудын ниицәнә гешүд орлцв. Семинарин йовудт шин төсвин иргчин тускар болн эн халхар халһх төрмүдин тускар тодрха күүндвр болв.
“Агроклассы как иннвационный проект профильного обучения” нертә танһчин семинар Городовиковск района Кировск дундын школд бүрдәгдснь бас учрта. Энүнд эрдм-сурһулин олн кемжәтә систем тогтагдв. Эннь бичкдүдин сад — школ —колледж — деед сурһуль — АПК-н предприятьмуд. Директор Ирина Гофартын келсәр, сурһульчнрин болн багшнрин далн процентнь Комсомолец болн Баһ Буурл СПК-н көдләчнр болжана. Ода сурһульчнр эврәннь күцәмжәрн бахмж кеж чадх. Давсн жилд эдн агроклассмудын цугәрәсән марһанд хойрдгч орм эзлв.
Кировск дундын школын директор Ирина Гофарт келсәр, эн көдлмш кехин төлә шишлнг систем бүрдәв. Иим үүлдвр негн-хойр жилдән көдлх зөв уга. Района болн танһчин иргчин төлә көдлх зөвтә. Гордовиковск района аһуд эрдмин училиш бәәнә.
Агрошкол олн кемжәтә эрдм-сурһулин нег әнгнь нерәдлһтә төсв күцәлһнә көдлмш Кировск дундын школд хойр минһн зурһадгч жилд эклсмн. Иим үүлдвр Хальмг танһчин правительствин дарук Лариса Васильеван седвәрәр күцәгдв. Зун эн программд шунмһа кеәвр зуг давсн жиләс авн эдн орв. Тиигхд көвүд-күүдин төлә өдгә цагин селәнә эдл-ахун техник ирв. Федеральн программар агртехникин күцц кемплект танһчин селәнә тавн школод өгв.
Хальмг танһчин агрошколмудын ниицәнә ахлач Артем Михайловин келсәр, танһчин министерств зурһан школ йилһж авла. Эннл Адг, Ачнр, Овата, Привольный селәдин, Кировский болн Первомайский школмуд. Федеральн программар хойр сай арслнга оборудовань хулдж авч. Эннь трактор, плуг, сеялк болн талдан чигн техник.
Городовиковск район ик кезәнәс авн буудян урһц икәр урһаж авдг район болжана. Энд буудян болн талдан чигн урһмлын байн урһц жил болһн хураж авна. Ода селәнә эдл-аху шинәс делгрлт авчах кемд, мержлттә кадрмуд дутжана.
Городовиковск РМО-н толһач Сергей Манжиковин келсәр, өдгәц агт кадрмуд дутжах ик хурц төр болжана. Селәнд көдлдг күн уга. Агроклассмуд тосв хойр минһн арвн һурвдгч жилд эклв. Ода Кировск дундын школд иим көдлмш делрглт авчана. Ода школд сурчах көвүд, иргчдән района селәнә эдл-ахун халхар көдлх нәәлвр бәәнә.
Энд аграрн һурвн эрдмәр сурһуль дасхжана. Эннь мал өсклһнә, агрономин болн селәнә эдл-ахун техникин эрдм. Ода арвдгч-арвн негдгч шишлнг классмудт хөрн хойр сурһульч сурчана. Давсн жилд школыг арвн һурвн күн төгсәв. Эднәс ик зунь энд дассн аграрн эрдмәр цаарандан сурх шиидвр авв. Эднә келсәр, Кировск школд һазр, селәнә эдл-ахун эрдм дурлх сурһмж өгсн деерән, һазр деер көдлх дасхна. Сурһульчнр трактор болн автомобиль залдг эрдмтә, темс болн зер-земш урһаж авдг дасна. Школд эврә бичкн теплиц болн инкубатор бәәнә. Давсн жилд энд сән күцәмж бәрв. Далн өндгнәс тәвн хойр һуужмл һарв. Энүг тер дарунь хулдв. Шингәж авсн мөнгәр цецгүдин болн темснә эк хулдж авч.
Арвн негдгч классин сурһульч Дарья Малышеван келсәр, иим керг эднд таасгджана. Гертән бас дөнцл эдл-аху хәләжәнә. Эк-эцкдән дөн күргнә. Темс школын һарудт урһаж авна.
Энд бәәх теплиц биотүләһәр дулалгдна. Тегәд чигн темснә экн көрхш. Давсн жилд көвүд-күүкд арвн тавн килограмм помидор урһаж авч. Эднә урасн темсн школьн столовд өггднә.
Агрономин багш Надежда Диденко келсәр, түрүләд школд дулан һазрт темс экләд урһана, хөөннь теплиц энүг тәрнә.
Давсн жилд школын аһуд зер-земшин сад тәргдв. Түрүн авгтан альмна, чииһин болн талдан чигн зер-земшин модн суулһгдв. Цөн жил болад энүнәс түрүн урһц хураж авч болх.
Көкән Герл, Мятежный Максим
