Хальмг танһчин баһ наста туужин номт Арлтан Басхаев шин дегтр бичв

Мана өвкнрин туужар иргч үйнр бахмж кеһәд, цаарандан эврәннь үйнртән медүлж күргх зөвтә гиж Хальмг танһчин баһ наста туужин номт Арлтан Басхаев тоолжана. Энүнә бичсн «Ойраты. Воины великой степи» нертә дегтр дорас өсж йовх баһчудт болн талдан чигн улст йир олз-туста болх. Энүнд өөрд улсин баатрьлг болн һашута туужин халхин тускар келгджәнә.

«Ойраты. Воины великой степи» нертә дегтр хойрдгч боть болжана. Баһ наста номт энүг һурвн жил шаху бичв. Түрүн боть болхла хойр минһн доладгч жилд барас һарла. Арлтан Босхаевин келсәр, шин дегтрт кесг соньн тоот умшж болх. Материал цуглулхин төлә, номт олн-зүсн статьяс, архивн документсиг шиншлх кергтә болв. Келхд, Москва балһснд чигн йовх саам учрв. Тенд Ленина нертә дегтрин сангд көдлв.

Туужин номин кандидат Арлтан Босхаевин келсәр, өөрднрин туужд дала соньн халхс бәәнә. Онц келхд, хальмг хаана зәрлгәр хальмгуд махла деерән улан зала өмсәд, эн жил 575 жилин өөн темдглдх. Өдгә цагт чигн хальмгуд бийән улан залатнр гиж нерәднә.

Баһ наста номтын келсәр, келн-улс болһн нарт-делкән туужд эврә тәвцән орулсмн. Өөрднрин туужд дала баатрльг болн һашута йовдлмуд бәәнә. Дәкәд болхла, мана өвкнрин туужд кесг баатрмуд бәәнә. Теднә зөрмг йовдлмуд маднд үлгүр үзмж болад үлдв.

Арлтан Босхаевин келсәр, эн дегтрт 12гч-18гч зун жилин өөрднрин туужин тускар келгджәнә. Өөрднрин түрүн әәмг тогтсна, Зүнһарин болн Китдин хоорнд болсн дәәнә тускар келгджәнә.

Иргчд болхла баһ наста номт Арлтан Босхаев өөрднрин тускар литературн-художественн дегтрмүд бичх зсаната. Энүнә келсәр, «Ойраты. Воины великой степи» нертә дегтр эврәннь өвкнриннь тууж медх саната улст соньн, олз-туста болх гиж нәәлжәнә.

Ээнән Делгр, Колдан Церен