Городовиковск бичкүдин герт зургудын соньн фестиваль болв
Городовиковск бичкүдин герт зургудын соньн фестиваль болв. Энүнә аш диглхәр гиичд региональн мөшклһнә комитетин һардач Денис Минин, Хальмг танһчин бичкдүдин зөвин күцц зөвтә элч Ольга Умгаева, эрдм-сурһулин министерствин, баһчудын болн спортын кергүдин комитетин элчнр ирв.
Гиичнр ирх гиһәд бичкдүд ик эртәсн тохнята белдвр кев. Хамгин икәр бичкн Эвита үүмәд бәәв. Эн күүкн хальмг улсин Чичрдг биилхәр белдв гиж сурһмжлачнр келнә. Элст балһснас ирсн гиичнр бичкдүдиг хальмг улсин әрүн Зулын байрла йөрәхәр болн зургудын марһана аш диглгхәр ирсмн. Болв эн дөрлдәнд диилвр бәрсн күн уга, шүүгдсн күн уга гиж шиидгдв. Гиичнр цугтаднь белгүд болн мөрә авч ирж. Спортын мяч, ракеткс, час болн талдан чигн белгдүт көвүд-күүкд тенкән уга гидгәр байрлв. Тер мет кикбоксингар нарта-делкән чемпион Бату Хасиковин илгәснбелгүд бичкдүдт бас икәр таасгдв. Хальмг танһчар Әрәсән мөшклһнә комитетин мөшклһнә заллтин һардач Денис Минина келсәр, хальмг улсин байрла йөрәж болн марһана аш диглхәр ирләвидн. Иим бичкдүдиг мартх зөв угавидн гиж Минин темдглв.
Энд бәәх көвүд-күүкд талдан бичкдүдәс тас йилһрхш. Эдн цугтан олн-зүсн наста болн эврә зангта. Зуг эдн цугтан эк-эцкән олж авхар нәәлжәнә.
Бичкдүдин герин сурһульч Давид Галакаевин келсәр, дегд ик сана зүүжәхш. Болв күцл бәәнә. Өсхләрн эрк биш журналитс болх санатав гиж Давид келнә.
Бичкдүдин герин директор Татьяна Онежко келсәр, энд бәәх көвүд-күүкд цуг таал бүрдәхәр көдләчнр зүткжәнә. Энд спортын комплекс, библиотек, эмчнрин хора, кергтә медицинск оборудовань бәәнә. Хот-хол кедг кухньта. Повармудын келсәр, шимтә болн амтта хот кехәр зүткнә. Давсн жилд энд шин немр гер тосхгдсмн. Энд тәвн бичкдүд бәәршлжәнә. Эн гер Әрәсән бичкдүд нертә федеральн программар бәргдв. Бичкдүдин герин директор Татьяна Онежко келсәр, иим шин гер эдлврт орхла, көвүд-күүкд икәр байрлв. Бичкдүд болһн эврә хората болв, иим сән таал бүрдәгдв.
Эн жил Городовиковск бичкдүдин герин долан көвүд-күүкдиг көвүшлж авсмн, һурвнь Итальд ода бәәнә. Энд үлдсн бичкдүд цугтан эврә өрк-бүлтә, эк-эцктә болх гиж икәр нәәлжәнә.
Санкун Кермн Хулхачин Николай
