Элстд әәмшгтә хаалһс дала
Хаалһд зун зеткртә йовдл учрв. Эннь зуг бичкдүд орлцата то-диг. Энүнә ашт нәәмн күн әмнәсн хаһцв, зун арвн тавн күн шавтв. Эннь давсн жилин аш болжана. Зеткртә йовдлмуд нурһлж хаалһин әәмшгтә һазрт учрна. Автоинспектормудын то-дигәр иим әәмшгтә һазрин тоод һурвдгч микрорайонд бәәх Чонкушовин нертә проспект йовна. Һурвн сарин эргцд энд һурвн зеткртә йовдл хаалһд учрв.
Хотл балһсна улс хаалһиг темдглсн һазрт керч йовжахш гиж эн зургуд герчлжәнә. Тегәд чигн жолачнр йовһн улсиг дәврдг йовдл баһржахш. Эдн генткн өөрхн йовж йовсн машина өөр хаалһд һарч ирнә. Зәрмдән маши залачнр дегд түргәр йовад әмт дәврнә. Хаалһ керчдг шишлнг һазр хол бәәнә гиһәд, эдн хаалһан ахрдулхин төлә иим хаалһ керчж һарна.
Цаг уга, адһж йовнав гиж эн залу күн келнә. Эн күүкд күүнә келсәр, хаалһин темдг энүнәс дегд хол, музучилишин өөн бәәнә. әәмшгтә һазр, энүг меджәнә. машид уга цагт хаалһ керчнәв гиж эн күүкд күн келв.
Тер саамд Элст балһснд Чонкушовин проспектд һурвдгч микрорайона эргдн хаалһас Рокчинскийн нертә уульнц күртл хаалһ йир әәмшгтә гиж тоолгдна. Энд кесг эрдм-сурһулин учреждень бәәнә, дала оютнр хаалһ керчнә. Нег үлү, удин кемд әмтн олра энд йовна. баһчуд бийән саглго, хаалһиг темдглсн һахрт керч һархш, дурта һазрар хаалһ керчнә. Эн зеткртә йовдлыг видеорегистратор цокж авч. Зокалар эс темдглсн һахрт хаалһ керчж йовсн күүк машин дәврж. ГИБДД-н статистикин то-дигәр, хаалһд учрдг зеткртә йовдлмудын һурвн кесн нег хүвнь бичкдүд болн баһчуд орлцатаһар учрна. Әәмшгтә һазрт әмтн йовдг хаалһд хаша углж тәвх неквр хотл балһсна администрацд йовулгдсн билә. Зуг эн неквр күцәгджәхш.
ГИБДД-н көдләч Василий Кекеевин келсәр, эн һазрт дегд әәмшгтә. Әмтн йовхд күнд. Давсн жилд энд бичкдүд орлцата нәәмн зеткртә йовдл учрв. Элст балһсна эдл-ахуд хйор дәкж эрлһ бичв. Әәмшгтә һазрт хаалһд темдг зурх кергтә.
Элст балһсна эдл-ахуд Госавтоинспекцин бичсн некврин тускар мана үүдәгч багас түрүн болж сонсв. Болв мана келсн зәнгиг оньгтан авв. Удл уга эн көдлмшиг күцәх үгән эдн маднд өгсн интервьюдан өгв.
Элст балһсна эдл-ахун Баснг Акиевин келсәр, Чонкушовин проспектын тускар цаасн ирсн уга. Эн жил тенд күүк машин дәврж. Тегәд эн обьектиг онц бүртклһнд авч. Эн жил әмтн йовдг хаалһ хашалгдх.
Ода Элстд иим әәмшгтә арвн һазр бәәнә. Энүнд хаалһин темдг шинрүлх кергтә, шишлнг хаша углж тәвх неквр бәәнә. Жолачнрин тоолврар, хотл балһснд зәрм һазрт урһа мод керчх кергтә. Үлгүрнь, Бендерин бумбин өөр доладгч болн йисдгч микрорайодын хоорнд нигт шагшгуд маши залачнрт боомтг болжана. Энд әмт зөөдг маршрутн автобусмуд зогсал кеж. Энүнә эргнд бәәх әмтн көдлмштән болн школд адһад йовхларн, шишлнг һазрар хаалһ керчж һарчахш. Тегәд машид әмт дәврх әәмшг бәәнә. Жолачнрин келсәр, шагшгуд һатцас йовж йовсн машид үзгдхш. Онц келхд, эн жиләс авн йовһн улс хаалһ керчдг һазр тас талдан өнгтә болх. Цаһан татасн заагт шар өнгтә татасн зургдх. Эннь хаалһд зеткртә йовдлмуд бһарулхин төлә кегджәнә. Иим хаалһин темдгиг болн хаалһ керчж йовх улсиг жолач сәәнәр үзнә гиж талдан регионмудт кесн дамшлт үзүлжәнә.
Элст балһсна эдл-ахун Баснг Акиевин келсәр, үвлин кемд хаалһд зурн темдг билрж одна. Хур-цасн орад, хаалһ цеврлхлә шир уга болж одна. Хойр долан хонг болад хаалһин темдг шинрүлһнә көдлмш эклх.
Тер саамд кен кенд ямаран эрлһ бичсн туск төр хаһлгджасн кемд, балһсна әмтн хаалһд машинд дәвргдә әәмшг бәәнә. Агчмин зуур учрсн зеткртә йовдлын ашт күн кесг жилдән зовна. Тегәд жолачнр болн йоһвн улс хаалһар сагар йовх зөвтә. Дааврта ведомствс болхла эврәннь көдлмшән сәәнәр күцәх неквр тәвгджәнә.
Ээнән Ольга, Котина Валерий
