Алвна инспекцд декларац орулж өгх кергтә

Арһлачнр болн нерән, машиһан хулдсн улс болн нерән нәәмдлһнә өгсн әмтн балһсна авлна инспекцд алвна декларац орулж өгх зөвтә. Эн жилин эклцәс авн нег минһн долан зун нәәмн күн иим документ орулж өгв. Эннь давсн жилин эн кемлә дүнцүлхлә арвн нәәмн процентд ик болж һарв.

Элст балһсна бәәрн күн Радик Хабибулин давсн жилд машиһан хулдж. Ода энүнә тускар апрелин һучн күртл декларац орулж өгх зөвтә. Машиһан хулдхин өмн ясвр кеһәд, хулдв. Ода декларацд алвна немр мөнг иршго гиж нәәлжәнә. Специалистнрин келсәр, энүнә орулж өгсн декларциг камеральн бүртклһнә йовудт хәләх.

Радик Хабибулина келсәр, хуучн хамхра маши хулдж авсн бәәж. Энүг ясхин төлә сольврин әнг кергтә болв. Ода энүнә тускар цаас цуглулжана. Ямаран документ алвна инспекцд орулж өгхин тускар медж авчана. Яһж декларац бичхинь келж өгв.

Татьяна Лиджиева болхлаг көвүһән эмнүлснә һару данцах төр үүмүлжәнә. Көвүнднь кесн операцин төлә зун тәвн минһн арслнг һарһв. Алвна инспекцин көдләчнр ямаран документ орулж өгхин тускар болн декаларц яһж бичхин тускар цәәлһвр кев. Ода эн күүкд күн танһчин талдан улсла әдл декларацан мартын арвн дөрвнд — арвн тавнд эс гиж апрелин арвн негнд арвн хойрла орулж өгч чаджана. Эн өдрмүдт Элст балһсна улсин төлә эвтә график кегдв. Энүг тадн ода эврәннь экрандан үзжәнәт.

Татьяна Лиджиеван келсәр, цуг кергтә цәәлһвр авч чадв. Ямаран документ орулж өгхинь медж авч. Ода энүг цуглулх кергтә. Мартын арвн дөрвнд эс гиж арвн тавнд ирәд орулж өгх санан бәәнә.

Тер саамд эн жилин эклцәс авн нег минһн долан зун нәәмн күн тооцаһанн өгв. Эннь давсн жилин эн кемлә дүнцүлхлә арвн нәәмн процентд ик болж һарчана. Алвна кодексла ирлцәтә эврәннь оруһин туск тооцаг әмтн апрелин һучн күртл орулж өгх зөвтә. Эннь хамгин түрүнд онц арһлачнр, нотариусммуд, адвокатмуд болн герән, машиһан хулдсн улс тооца кех зөвтә. Һурвн жилдән маши олзлсн улс иим тооца өгх зөвтә болн герән нәәмдлһнә өгсн әмтн бас декларац орулж өгх закан бәәнә.

Элст балһснд Әрәсән алвна инспекцин ахлачин дарук Наталья Максимован келсәр, Әрәсән алвна кодексар декларац өгх улсин категорь бәәнә. Эдн иим документыг апрелин һучн күртл орулж өгх зөвтә. Цаглань иим цаас эс орулж өгхлә, эдн засгла харһулгдх. Декларцин мөнгнә кемжәнәс тавн процент ял авгдна. Ут-тоодан иим ял һучн процентас давх зөв уга, тер мет нег минһн арслнгас баһ болх зөв уга.

Алвна инспекцин бүрдәжәх керг-үүлдврин йовудт танчин улс ямаран чигн сурврмудт хәрү авч чаджана. Декларац чикәр бичхин төлә специалистнр дөн күргхдән белн бәәнә. Шишлнг документ бичхд амр биш. Алвна инспекцд дөч һарсн улс ирнә. Эдн компьютерар көдлж чадхш. Тегәд эднд нөкд болх кергтә. Нег үлү данцалһна мөнг өглһнә диг-даран сольгдв. Иим сольвр эн жилин январин нег шинин хөөн хулд кесн улс кех.

Ээнән Ольга, Котина Валерий