Алексей Орлов ар үзгин райодт одв

Синоптикүдин тааврар, иргч өдрмүдт мана танһчд бүркг өдрмүд болх, хур орх. Аһарин кемжән нәәмн градус дулан болх. Одахн учрсн салькна аюлас көлтә ик һару һарв. Иим райодт танһчин толһач Алексйе Орлов одад ирв.

Хальмг танһчин толһач Алексей Орлов Октябрьск, Баһ Дөрвдә болн Көтчнрә райодт одв. Тенд РМО-н кесг һардачнрла харһад күүндв. Эдн танһчин толһачд аюлын һарун тускар, ясврин көдлмшин зуран тускар тодрха тооца өгв.

Октябрьск РМО-н толһач Санл Адьяевин келсәр, өцклүдр цуг селәдт электрокүчн өггдв, зуг Хошуд селәнд герл уга. Тенд дала бахн унж. Ода тенд бригад көдлжәнә. Эндр Хошуд селәнд электрокүчн өггдх зөвтә.

Региональн МЧС-ин һардачин үүл даажах Александр Погореловин кесн то-дигәр, Хальмг танһчин аһуд кесг дуунад электрокүчнә залһлдана сунһуг эвдрв, хөрн зурһан селән электрогерл уга үлдв. Элст балсһнд танючин бичкдүдин больницин герин ора икәр эдврж. Октябрьск района цутхлнг Ик Царнг селәнд негдгч тойгта дундын школын герин ора догшн салькн авч шивж. Урднь сурһулин учрежденя герин ораг апрелин нег шин күртл шинрүлж ясх шиидвр авгдсн билә. Болв танһчин толһач дор ормднь аюлын һару эврәннь нүдәрн үзчкәд, района һардачнрт талдан даалһвр өгв.

Танһчин толһач Алексей Орловин келсәр, школын герт талдан ора кергтә. Эннь удан кегдх. Тер бийнь иим көдлмш күцәх кергтә. Зуг эн көдлмшиг удандан татх керг уга. Май сарин байрла ора ясгдх зөвтә. Нег үлү, государственн шүүвр өгх кергтә. Ик Царн селәнә школ эн туст ик көдлмш кех.

Үстин районд электрокүчнә залһлдан бахн унж. Тер мет трансоформаторн станцд эвдрлт учрв. Сарпинск районд хамгин ик һару Уманцево селәнә фельдшерск акушерск пунктд һарв. Энүнд герин ораг салькн авч шивж.

Сарпинск РМО-н толһач Юрий Жуковин келсәр, герин ора эвдрв, шифер авч шивж. Далн тавн шифер кергтә. Зун жирн минһн арслнг һару һарв. Обильное селәнд склад эвдрв. Тенд бас ораһинь салькн авч шивж. Ода бәәрн улс субботник кежәнә. Ода Коробкин, Догзмахн, Баһ малан селәдт электрокүчн уга. Баһ Дөрвдә района РМО-н толһач Геннадйи Золочевский келсәр, цуг гермүд эвдрлт учрсн уга. Тер бийнь һару һас һарв.

Ода райодын һардачнр аюлас көлтә һарсн һару тоолж һарһжана. Эднә тоолсар кесг минһн арслнг һару һарв.

Көтчнрә РМО-н толһач Валерий Очировин келсәр, Көглт селәнә школын герин ора эвдрв. Чкаловское селәнд бас школын герин ораг салькн авч шивж. Шифер бәәнә. Эврәннь чидләрн ясвр кех зура бәәнә.

Танһчин толһач дор ормднь райодын толһачнрт тогстн бәәдләс яһж һархин тускар шишлнг даалһвр өггдв. Энүнә төлә мөнгн давсн жилд темдглж авгдсн бәәж. Энүнә төлә танһчин болн райодын көрнгин санг тогтагдв.

Танһчин толһач Алексей Орловин келсәр, ода цуг аһург тоолж болшго. Болв һару дегд ик. Энүг ясхин төлә цуг мөнгн бәәнә. Ясврин көдлмш цаглань кегдх.

Хавтхна Элла, Хулхачин Никола