Әрәсән деед сурһульд документ орулж авлһн эндр төгсжәнә
Эндр Әрәсән деед сурһульд документ орулж авлһн төгсжәнә. Ода школан чиләсн баһчуд дурта эрдмән шүүж авчана. Эннь йир Б-З: дааврта кем, юнгад гихлә күн болһн дурлсн эрдмән шүүж авсн деерән, жирһлин ут хаалһдан оржах темдг болжана. Зәрм көвүд-күүкд ик балһсдт сурх саната. Хальмгин баһчуд сән медрл авсан үзүлжәнә. Энд үлджәх баһчуд болхла ор һанцхн государственн университетд орхар зүткжәнә.
Деед сурһульд орх баһчудын тоод Церн Васькаев эврәннь нер-усан олж авв. Эврәннь һаран юм кеж чаддг улс оньдин кергтә болх гиж дотран санад иим эрдм шүүж авч. Промышленн болн гражданск тосхлт нертә эрдмәр сурхар документан орулж өгв. Абитуриент Церн Васькаевин келсәр, эврәннь төрскн һазртан сурхд төвкнүн болна. Москва эс гиж Санкт-Петербург балһснд одад сурхар седв, зуг Хальмг танһчд бас сән сурһуль өгнә.
Эн жил Хальмгин государтсвенн университетд орх улсин то дегд ик. Бакалавриатын зурһан зун найн негн бюджетн ормд һурвн минһн эрлһ баһчуд орулж өгв. Абитуриентнр дунд һучн һурвн күн алтн медальта, тәвн долан баһчуд цаһан мөнгн медаляр школан төгсәж. Онц келхд, Әрәсән гражданмудла хамдан бюджетн ормд Киргизин, Таджикистана, Азербайджана, Грузин болн Беларуссин баһчуд бас орх саната. Тер мет мана танһчла хам-хоша бәәх регионмудас олн көвүд-күүкд иржәнә. Ода хамгин сән гисн эрдмин нег ормд дөчн күн орх документ орулж өгв.
Хальмгин университетин проректор Валерий Эвиевин келсәр, эн жил баһчуд хамгин олар экономикин, юриспруденцин эрдмд оржана. Энүнд нег ормд дөчн күн орх сана зүүв. Хамгин баһар баһчуд аграрн факультетд оржана. Ода деед сурһульд орх көвүд-күүкдин нерн бичгдв. Эннь урдасн кесн аш болжана. Өдгәц агт Хальмгин университетд орх саната улс эврәннь медрлән болн билгән урдаснь шинжлж, ямаран эрдмд орж сурхинь шүүж авч чаджана. Хальмгин университетин ректор Бадм Салаевин келсәр, августын дөрвн күртл бачһуд йосн документан ав ирх зөвтә. кемр эс авч ирхлә, марһанас эдн һарх. Эднә ормд талдан улс орх.
Жил болһн Хальмгин деед сурһульд оржах көвүд-күүкдәс арвн тавн процентнь бооцана эв-арһар оржана. Эн жиләс авн бакалавриатд сурхин төлә жирн минһн арслснг өгх кергтә, магистратурин программар болхла далн минһн арслнг кергтә. Сурһульдан мөнг эс өгч чадшго улс болхла августын тавн күртл заочн факультетд документан орулж чаджана. Удл уга иим эв-арһ деед сурһульд уга болх бәәдлтә. Тегәд Хальмгин университетд очн кевәр сурһульд эс орсн баһчуд, көдлн бәәж сурж чадхмн.
Санкун Кермн, Котина Валерий
