Әрәсәд эн өдрмүдт шүүвр өглһнә кем төгсв

Цаглань орс келәр ЕГЭ-н шүүврән эс өгч чадсн уга сурһульчнр эндр өдр өгсн билә. Ашлад келхлә бүкл Әрәсәд эн өдрмүдт шүүвр өглһнә кем төгссв. Эн жилд давсн жиллә әдл олн зүсн боомтг учрсн билә. Өдгә цагт Липецк областьд, Хальмг Танһчин болн Ингушетия республиктд тиим боомтг олар харһв.

Элст балһснур физикин ЕГЭ-н шүүврән өгхәр Санджин Никита Яшалтан районас ирв. Эврәннь райондан баһ наста көвүн обшествознание предметар шүүвр өгсн билә. Элст балһснд шүүврән өгхд йир күнд болв гиж көвүн келв.

Шүүвр өгсн кемлә багш мадна өөр нааран цааран йовв. Шүүвр өгхд йир әәмшгтә болв — гиж Санжин Никита келв. Эндр өдр шүүврән өгхәр Элст балһсна 18 тойгта школд школан эн жилд школан төгсәсн йирн һурвн көвүд күүкд ирв. Эн сурһульчнр цаглань шүүврән олн зүсн урчас өгч чадсн уга. Бүрдәһәчнрин келсәр эн өдр кесг көвүд күүкд шүүврән өгхәр ирх зөвтә бәәсмн, аштнь өрәлнь ирв.

Данара Санджиеван келсәр эндр өдр олн бал хоршаж авсн көвүд күүкдд эн шүүвр керго болв, тегәд эдн эндр ирсн уга. Эн кемлә школан төгсәсн хойр минһн һар көвүд күүкд болн дунд сурһульд сурһуль сурч йовсн тавн зун сурһульчнр өгв. Зун бал орс келәр хөрн хойр сурһульч хоршаж авб. Давсн жиллә ирлцүлхлә эн жилд сурһульчнрин медрл йир сән. Эн өдрмүдт Әрәсән сурһуль эрдмин специалистнр орс келнә шүүврәр бүртллһнә көдлмш давулжана.

Давсн жилд болн эн жилд сурһльчнр сәәнәр шүүврән өгв. Федеральн шүүврин комисс туужин предметар болн сурһульчнрин көдлмшиг шалһж хәләв. Энүнд нег чигн боомтг олж авсн уга.

Хальмг Танһчин эрдм сурһулин номин болн сойлын министрин дарук Кавкиша Иринан келәср хойр күн орс келин шүүврәсн сулһгдв. Тер юнгад гихлә эн сурһльчнр шүүвр өгсн цагла телефо олзлад интернетд орсн билә. Тегәд ирх жилд эн сурһульчнр шүүврән өгч чаджана.

Хальмг Танһчд бичкн бал авсн 20 сурһульчнр эн жилд аттестат авч чадшго. Эн сурһульчнр асхни школ төгсәсн билә.

Дмитрин Татьяна, Бадмаран Владислав