Һәрә Рокчинскийн һәәхүл лицейд секгдв
“Сказ о Калмыкии”. Элстин лицейд эн өдрмүдт Хальмг АССР-ин ачта үүлдәч, РСФСР-ин олн-әмтнә зурач Һәрә Рокчинскийн йирн жилин өөнд нерәдгдсн иим нерәдлһтә һәәхүл секгдв. Энүнд мана танһчин нертә зурачин хамгин сән үүдәврмүд үзж болх.
Элстин лицейин һәәхүлин залд Хальмг танһчин дүрслгч искусствин билгтә үүлдәчин хамгин нер туурсн үүдәврмүд, тер тоод “Мать — земля родная”, “Сказ о Монголии”, Зая-Пандитан зург үзж болх. Искусствоведеня доектор болн олн-әмтнә зурачин күүкнь Светлана Батырева эцкиннь зургудын тускар цәәлһвр өгәд, Рокчинскийн үүдәлтин хаалһин тускар тодрхаһар келж өгв. Энүнә келсәр, Һәрә Рокчинскийн онц һәхүл ончта өөнд нерәдгдсн керг-үүлдврмүдин эклц болв. Һәрә Рокчинскийн күүкн Светлана Батыреван келсәр, монһлын төр Һәрә Олеговичин үүдәлтд һол орм эзлжәнә. Эннь мана өвкнрин сойлын унг болжана. Энүнә үүдәлт мадниг хол цутхлнгд Азьд деед Монһлд күргж йовулна. Ода монһл болн хальмг улсиг негдүлжәх бат залһлдан тогтв.
Хамгин икәр Рокчинскийн үүдәврмүд һәәхүл секлһнә байрт орлцсн Тод номин герл нертә монһлын олна организацин элчнриг өврүлв. Барун Монһлын Увс әәмгин элчнр, Әрәсән туужин кафедрин аспирант Нарн Жирһлин болн Хальмгин государственн университетин хальмгин литературин болн фольклористикин кафедрин аспирант Намджидин келсәр, Увс нур нертә зургуд эднә төрскн һазр йир сәәнәр үзүлжәнә. Хальмгин университетин туужин кафедрин аспирант Нарн Жирһлин келсәр, Һәрә Рокичнскийн үүдәврмүд мана келн-улсин баатрльг ухан-седкләрн йилһрнә. Тегәд иим зургуд хальмгудын, цуг өөрднрин болн монһл улсин зүркнд өөрхн.
Зурачин күүкн, искусствоведеня доктор Светлана Батырева Монһлын баһ наста номтнрт Әрәсә болн Монһл нертә туужин үнтә дегтр болн хальмг келәр барлгдсн келн-улсин алдр Жанһр өвәрц дуулврин һарц белглв. Эврәннь төсркн һазрин утскар зурсн зургуд үзчкәд, Намджид монһлын хуучн ут ду дуулж өгв.
Иргч сарнг өдр Пальмовин нертә келн-улсин музейин художественн залд хальмгин дүрслгч искусствин алдр үүлдәчнр нертә һәәхүл секгдх. Энүнд мана танһчин ууһн зурачнрин үүдәсн зург зурлһна эрдмин, графикин болн скульптурин зун көдлмш үзж болх.
Бевина Мергн, Бадмаран Владислав
