Һурвн жил болад Хальмгт бичкдүдин садмудт чеерүд уга болх

Әрәсән Президентин даалһврар бичкдүдин садмудын төр сәәнәр хаһлжах регионмуд дунд Хальмг танһч йовна. Энүнә тускар дошкольн эрдм-сурһулин халх шинрүлһнә төрмүдәр болсн селвлцәнә йовудт премьер-министр Дмитрий Медведев зәнглв. Эн туст Хальмг танһчд хурц төр хаһлхин төлә шишлнг программ батлж авгдж күцәгджәнә. Хойр минһн арвн зурһадгч жил күртл бичкдүдин садмудт чеерүд уга болх. Ода деерән программ сәәнәр күцәгджәнә.

Регионмудын һардачнрла болсн селвлцәнә йовудт Дмитрий Медведев һол төр болж бичкдүдин садмуд тосхлһна болн энүнә төлә йовулсн федеральн мөнг олзлһна тускар күүндв. Дошкольн учрежденя төлә субьектмуд мөнг кредитин системар эрдм-сурһулин халх шинрүлһнә федеральн программар авчана. Бичкдүдин садмудын төр сәәнәр хаһлгджах арвн региоан тоод Хальмг танһчд орв.

Әрәсән премьер-министр Дмитрий Медведевин келсәр, зәрм регионмуд ахр болзгт йилһж өгсн мөнг олзлв. Иим арвн региона тоод Удмурть, Тамбовск область, Амурск область, Хальмг танһч йовна. Энд йилһж өгсн мөнгнә өрәлинь эс гиж бүклднь олзлж.

Эн жилин чилчг күртл Элст балһснд һурвн зун көвүн-күүкн дошкольн учрежденьд орж чадх. Элстин өмүн үзгин районд Шапшукован нертә уульнцд шин сад тосхгджана. Энүнә төлә хотл балһсна хазнас зун һучн зурһан сай арлснг йилһж өггдв. Ипподромная уульнцд усар тетклһнә, канализацин болн дула өглһнә систем углж тәвгдв. Ода шин садт шалдарин болн ширдлһнә көдлмш кегджәнә. Танһчин селнәдт болхла хуучн гермүд шинрүләд, дошкольн учрежденьд өгчәнә. Хальмг танһчд иим социальн обьектмудын ик чинр зүүжәхәс иштә эн төриг танһчин толһач Алексей Орлов эврәннь бүртклһнд авв.

Танһчин толһач Алексей Орловин келсәр, танһчин зәрм райодт бичкдүдинс адт орх чеерүд тас уга. Чееүрд бәәх райодт эн төр удл уга хаһлгдх. Әрәсән президентин даалһврар иргч һурвн жил эн төриг күцц хаһлх зура бәәнә.

Арвн һурвдгч бичкдүдин садын шинрүлж яслһна көдлмшт бәәрн бюджетас арвн нәәмн сай арслнг йилһж өггдв. Энүнд йирн көвүн-күүкн оржана. Элст балһсна бәәрн күүкд күн Валерия Церенован келсәр, дошкольн учреждень балһсна цутхлнгд бәәснь энүнд эвтә болв. Ода энүнә күүкн Элст балһсна хамгин сән садт орсна хөөн, көдлмштән һарч болх.

Валерия Церенован келсәр, нилх төрснәс авн садт орх чеерүдт зогсв. Кесгтән күләж. Ода ик байрта бәәнә. У-сарул хорас, цугнь шин. Наадлһан плошадк таасгдв. Ке-сәәхн плошадкт бичкдүдт наадхд сән болх.

Бичкдүдин садт чеерүд баһрулхин төлә талдан организацд өггдсн хуучн гермүдиг шинрүлж ясад, дошкольн учрежеднь өгчәнә. Тер мет талдан чигн шиидвр авгджана. Тер тоод дошкольн учрежедньст немр орм секгджәнә, эзнә бичкдүдин садмудт онц оньг өггджәнә. Эн өдрмүдт тосхлытн көдлмш хөрн һурвдгч школд кегджәнә. Энүнә садын хойр баг көдлх. Школд хөрн доладгч садын әнг секгдх. Ноябрь сард эк-эцкнр нааран күүкдән орулж чадх. Тәвн көвүн-күүкн орх сад шинрүлж яслһна төлә нег сай арслнг федеральн мөнгн йилһж өггдв. Тер мет балһсна бюджетас бас мөнгн иржәнә.

Элстин эрдм-сурһулин заллтин әнгин ахлач Наталья Бютцинован келсәр, эн жилин чилгч күртл долан зун тавн немр орм дошкольн учрежденьд секгдх. Зураһар зурһан зун тавн орм секх зөвтә билә.

Эндр өдрт танһчин тавн зун көвүн-күүкн сад орхар чеерүд зогсжана. Дошкольн учрежденьст немр орм сексн хөөн чеерүд жил ирвәс баһрад йовна.

Ээнән Ольга, Хавтхна Анатолий