Үвлин киитиг заһс бәрдг болн спортд дурта улс олзлжана
Эн өдрмүдт Хальмг танһчин усна обьектмудт МЧС-ин региональн заллтин баһ кермсин төрәр көдлжәх инспектормуд киитрхлә мөснә зузана кемжәг шинжлжәнә. Сүл цагт кесн шинжлтәр, Колонск боодгт мөснә зузана кемжән арвн хойр арвн һурвн сантиметрт күрнә, Сарпа нуурт арвн һурвн — арвн тавн, Чоһран усна боодгт мөсн арвн — арвн негн сантиметрт көрч. Иим мөснд әмтн һарч болх гиж тоолгдна. Иим үвлин таал спортд дурта улс олзлжана.
Сергей Кравцов кесг жилдән заһс иим кемд бәрнә. Ода эннь хоосн зог биш, йоста дурта эрдм болв. Ода үвлин кемд мөсн дорас заһс бәрдг эрдм таасгджана. Иим кемд заһс бәрхд бас жанһрта болна гиж Сергей келнә. Негдвәр, мөсн деер нег биш, цөн нүк бурһудх кергтә. Мөснә зузанинь, усна гүүнинь, йоралин бәәдл бас шинжлх кергтә болна. Тер мет иим кемд заһснд түрүләд хотлхла сән болх. Үвлин кемд энүнә төлә олн-зүсн хорха олзлгдна. Сергей Кравцовин келсәр, үвлин кемд заһс бәрхдән дурта. Усна боодгт альд болв чигн заһс бәрж болна. Зунын кемд иим һазрт күрч болхш.
Келхд, февраль сард мана танһчд жил болһн болдг марһан болх. Тегәд сән тохнята белдвр кехин төлә ода чигн цаг бәәнә. Ода болхла Колонск боодгт мөсн арвн хойр сантиметр зузандан көрч. ГИМС-ин цутхлнгин көдләчнр өдр болһн мөснә зузанинь шинжлж хәләнә. Харсачнрин келсәр, иим зузан мөсәр һанцх күн боодг һатлж чадх. Болв хулсна өөр мөсн дегд зузан биш. Тегәд үвлин кемд заһс бәрдг әмтн болн конькиһар дошдг улс иим һазрт саг бәәх зөвтә. ГИМС-ин цутхлнгин госинспектор Олег Амаевин келсәр, олн улс боодг һатлхин төлә мөсн хөрн тавн сантиметрт көрх зөвтә. Хойр өдр болад, иим киитн болхла, нааран олн әмтн ирж чадх.
Элстин хоккеистнр үвлин эклцәс авн иим киитн өдрмүд күләһә. Спортсменмүдин келсәр, урднь бичкдүд хоккей наадхдан йир дурта билә. Ода болхла баһчуд иим наад дурлхш. Хамдан церглж йовсн улс болхла кесг жилдән иим наад наадад, бичкдүдт үлгүр болх саната. Валерий Кутушовин келсәр, иим наад бичкндән наадж йовж. Мөсн көрхлә нааран ирәд, нәәжнрләһән хоккей нааднавидн. Коньки болн клюшкс эдн Әрәсән ик балсһдт хулдж авна. Тегәд иим киитн өдрмүд тогтсинь олзлад, өдр болһн һурвн часин хөөн эдн цуглрад, дурта наадан наадна. Ода мана танһчд үвлин спорта әмтн баһар соньмсжана. Юнгад гихлә, иим киитн өдрмүд удан болхш. Тегәд иим тенгрин бәәдл олзлад, эдн цевр аһар киилж, цогц-махмудан батрулжана.
Татьяна Дмитриева, Бадмаран Владислав
