“Жилин багш” танһчин марһан эклв

Эндр Элст балһснд “Жилин багш” нертә танһчин марһана товчлгч девснг эклв. Школмудт болсн марһанд тәвн зун багш орлцв, муниципальн дөрлдәнд һурвн зун күн дииләчән йилһв. Предметин багшин марһанд арвн хойр күн орлцжана. Немр эрдм-сурһулин багшнрин дөрлдәнд арвн негн багш, тер мет арвн негн багш “Дебют” категорь дииләчән йилһхмн. Марһан арвн хойрдгч школд болжана.

Предметин багшин номинацд танһчин райодас болн Элст балһснас арвн хойр багш дииләчән йилһв. Марһана түрүн даалһврнь визитн карточк. Энүнд эрдм-сурһулин көдләчнр эврәннь эрдмин билгән үзүлж, сцен деер бйиән бәрдгән болн артистнин эрдмән медүлх зөвтә бәәсмн. Элст балһсна һурвдчг школын баһ наста багш Александр Ким олн улст таасгдад, энүг хәләһәчнр бүләнәр тосв. Эврәннь дурта эрдмин тускар дууһар дамжулж медүлв.

Элстин һурвдгч школын англь келнә багш Александр Ким келсәр, эн дууг англь келәр дуулв. Эн дун мини ухан-сананла ирлцжәнә. Шүүж авсн эрдмдән йир дурта. Цаарандан чигн школд көдләд, бичкдүдт англь кел дасхх санан бәәнә.

Ик — Буурла района Орһахна дундын школын хальмг келнә багш төрскн келән йилһән сәәнәр меддгән үзүлсн деерән, хальмг улсин урн үгин зөөр далн хойр худл олзлад марһана түрүн даалһвр күцәв. Эврәннь тускар келж өгхләрн, хальмгин үлгүрмүд, урн уг олзлад шүлгәр келж өгв.

Дөрлдәнә түрүн даалһвр күцәсн цагт багшнр гирь өргв, шүлгүд умшв, дуд дуулв. Эднә зәрмнь гертән сурһульчнла сән белдвр кесән үзүлв.

Энүнә хөөн марһана орлцачнр багшин эрдмән үзүлв. Эрдм-сурһулин дисциплина багшнр ил кичәлмүд кев. классн час болн эк-эцкнрин хург бүрдәв. Дөрлдәнә орлцачнриг чанһ неквртә жюри үнлв. Энүнә ханьд эрдм-сурһулин министерствин, РИПКРО-н болн Хальмгин государственн универистетин элчнр орв.

Хальмгин университетин химин кафедрин профессор, жюрин гешүн Полина Васильеван келсәр, марһана һол некврнь — багшнр эврәннь эрдмән предметан сәәнәр медх зөвтә. Седвәрч болн үүдгч кевәр көдлдг багшнр сурһульчнриг эврәннь предметарн соньмсулж, өдгә цагин шин эв-арһ көдлмштән олзлх зөвтә.

Марһана дииләч манһдур медгдх. Энүнә нер усиг танһчин марһан байрин бәәлд хаалһна байрт заах. Ут-тоодан "Жилин багш" нер зүүхин төлә һучн дөврн күн дөрлджәнә.

Көкән Герл, Эрнжәнә Эрднь