"Жанһр" ансамбль фестивалин дииләч болв
“Вместе — мы Россия”. Иим нерәдлһтә цугәрәсән фестивалин межрегиональн девснг Ставрополь балһснд бсолв. Энүнд Өмн үзгин болн Ар Кавказин федеральн округсин коллективмуд орлцв. Хальмг танһчин нер энүнд олн-әмтнә үүдәлтин танһчин гер харсв. Энүнә ханьд урн һарта эрдмчнр болн художественн эврә дурар үүлддг артистнр билг-эрдмән үзүлв.
“Жанһр” нертә Әрәсән олн-әмтнә үүдәлтин ачта коллектив жюрин оньгт һучн минутн программ тусхав. Эднә программд сарин литәр шин жилин байр тосхлһна Цам бииһин тасрха, дөрвдә Товшур, чичрдг би олнд үзүлв. Жюрин гешүд болн кесг әмтн хальмгин артистнрин билг-эрдмиг өөдәнәр үнлв. Аштнь “Жанһр” коллектив фестивалин лауреатын нер зүүв.
Цуг Әрәсәд болжах иим керг-үүлдврин һол күцлнь — келн-улсин хоорндк хәрлцә батрулһн болжана. Ансамблин орлцачнрин темдглсәр, олн-әмтнә үүдәлтин ке-сәәхн байр талдан келн-улсин сойлла өөрхнь таньлдх арһ өгв. Энүнә тускар артистнр ухан-тоолврарн хувалцв.
Фестиваль йир икәр таасгдв гиж эн көвүн келнә. Репетиц иим фестиваллә дүнцүлж болшго. Иим фестиваль кесгтән мартшгдшго гиж эн күүкн келв. Эн көвүн келсәр, орс улсин би болн кавказин би таасгдв. Блиц 4 иим фестивальд эврәннь сойлан үзүлсн деерән, талдан келн-улсин сойлла өөрхн таньлдж болх.
Тер мет гиичнрин болн фестивалин орлцачнрин оньг хальмгин урн һарта эрдмчнрин һәәхүл авлв. Энүнд ювелирмудын, скульптормудын, талдан чигн эрдмчнрин кегдлүмд болн хальмг улсин костюм үзүлгдв. Хальмгин сойлын ачта көдләч Баатр Манджиев болхла хальмг улсин алдр “Жанһр” дуулврин тасрха дуулж өгв. Келн-улсин көгжмин ансамблин болн урн һарин эрдмин номинацд Хальмг танһчин делегац негдгч девснгин дипломар ачлгдв.
Жанһр ансамблин һардач Валерий Бадмаевин келсәр, келн-улсин сойлын зангшал хадһлһнд болн дорас өсж йовх баһчудт оюни шагшавдын сурһмж өглһнд олн-әмтнә үүдәлт ик чинр зүүжәнә. Валерйи бадмаев дөчн жилдән бииһин эрдмәр көдлжәнә. Хөрн хойр жилдән «Бамб цецг» государственн ансамбльд көдлв. «Жанһр» ансамблиг хөрн долан жилд һарджана. Фестивальд энүнә һарджах коллектив диилвр бәрнь энүнә ач-тусин герч болжана. Бадмаевин келсәр, хамгин түрүнд цуг коллективин өдр болһн күцәдг көдлмш сән нилчән күргв.
Хальмг танһчин ачта артист Валерий Бадмаевин келсәр, негдгч орм эзлх гиж санжасн уга. Тегәд икәр цугтан байрлв. Эннь цуг ансамблин күцәмж болжана.
«Жанһр» нертә келн-улсин ансамбль болн мана өвкнрин зөөр хадһлад делгрүлхмн нертә урн һарин эрдмин һәәхүл ноябрин дөрвнд Москва балһснд болх олн-әмтнә негдлтин байрин программд орлцх.
Ээнән Делгр, Котина Валерий
