Залврин компаньсин көдлмшт бүрткгдв

Олн давхрта гермүдин залврин компаньс бәәрн улсин мөнгиг талдан халхар олзлсна тускар Элст балһсна прокуратур мөшклһнә органмудт материалмуд йовулв. Энүнә тускар прокуратурин көдләчнр зәнглв. Коммунальн көрнгәр теткдг предприятьмудт арвн дөрвн залврин компань өрнд унснас иштә прокуратурин көдләчнр финансин бюджетн бүртклһнә церглтин специалистнрла хамдан эн жилин февраль сард бүртклһ кесмн. Тер мет герин ясвр кехин төлә, олн давхрта гермүд хәләж ясхин төлә әмтнәс авсн мөнгн яһж олзлгдсна тускар бүртклһн кегдв. Ода Элст балһснд олн аптьрта әмтн бәәдг тавн зун арвн долан гер бәәнә. Эднәс дөрвн зун дөчн хойр гериг арвн дөрвн залврин компань, арвн һурвн гермүдин эздүдин ниицән, жирн хойр талдан компань хәләж теткнә. Әмтнәс авсн мөнгиг зәрм залврин компаньс коммунальн көрнгәр теткдг организацд күцц өгдго бәәж. Эн мөнгиг эдн производвстин болн талдан чигн халхар олзлж.