ЗАГС-ин көдләчнр ончта өөнән темдглжәнә

Эндр Амр Санана нертә келн-улсин библиотект Әрәсән ЗАГС-ин йирн тавн жилин өөнд нерәдгдсн байрин хург болв. ЗАГС-ин органмуд бүрдәгдснәс авн олн ведомствсин медлд оржала. Сүл цагт ЗАГС-ин органмудын көдлмшин чинр өөдлв. Тегәд энүнд сольвр орулх неквр тәвгдв гиж энүнә һардач Ольга Давашкина темдглв. Ода эн систем хамгин тогтурта болн бат улта халх болжана. Күн болһна гражданск бәәдлд сольвр кегдсиг эдн темдглж бичнә. ЗАГС-ин халхар туслмж күрглһнә чинринь өөдлүлхин, энд көдлжәх улсин медрл гүүдүлһнә, көдлмшән даавртаһар күцәлһнә тускар хургт келгдв. Ода мана танһчд арвн һурвн ЗАГС көдлжәнә. Хургин йовудт йирн тавн жилин өөнлә ирлцүлж олн жилдән чидлән нөөлго көдлсн төләд ведомствин нүүрлгч көдләчнр ханлтын бичгәр, күндлһнә һашгудар ачлгдв.