ЮРПА-н дарани конференц болв
Волгоград балһснд Өмн үзгин Әрәсән парламентск ниицәнә арвн йисдгч конференц болв. Энүнд депутатнр экономическ политикин, промышленн делгрлтин, агропромышленн халхин көдлмшин болн келн-улсин хоорндк хәрләцәнә тускар күүндвр кев.
Өмн үзгин федеральн округин нәәмн региона элчнр дарани конференцд орлцв. Делегац болһн эврәннь улсин бәәдл-жирһл ясрулһна тускар эврәннь седвәрән медүлв. Хамгин түрүн конференцд орлцачнр дәәнә цагт әмнәсн хаһцсн салдснрин мемориалд цецгүд тәвцхәв. Дәкәд нег тодлад келхлә, эн жил Сталинградск дәәлдәнә далн жилин өөн темдглгдв.
Цааранднь конференцин көдлмш комитетмудар кегдв. Регинальн парламентин һардачнр Волгогрдаск областин Думин ахлачин һардврт “Титан” нертә цутхлнг конструкторск бюрод одв. Эн олн халхта хаалһата предприят энүнд өдгә цагин шин өвәрц шинжлт кегднә. Бюрод шинжлтын төлә цуг кергтә оборудовань бәәнә. Әрәсән сухопутн цергин, цергә тенгин флотын, ПВО-н цергин болн талдан чигн цергин төлә энүнд зер-зев кеж һарһдг нүүрлгч предприять болжана.
“Титан нертә” ЦКБ-н конструктор Равиль Закировин келсәр, хойр минһн арвн негдчг жиләс авн Титан нертә ЦКБ Әрәсән цергиг шин зер-зевәр тетклһнә программд орв. Энүнә төлә шин оборудовань хулдж авгдв. Ода ут-тоодан хөрн иим оборудваонь көдлжәнә. Ода дәкәд һурвн өдгә цагин некрвлә ирлцәтә оборудовань экләд көдлх.
Энүнә хөөн цутхлнг конструкторск бюрод хүүвинс үүр болв. Энүнд тавн төр хәләгдв. Тер тоод Приволжсе федеральн округла, Ар Кавказин парламентск ниицәнлә нөкцлт кех зөвшәлин тускар депутатнр күүндв. Энүнә тускар зөвшәлт дарани хөрдгч ЮРПА-н сүүрт батлж авгдх. Конференцин товчлгч сүүр Сталинградская битва нертә музейд болв. Энүнд дөнч төрәр күүндвр болв.
Хальмг танһчин олн-әмтнә хуралын ахлач Анатолий Козачкон келсәр, сүүрт дәәнә цагт фронтын зонд көдлсн улсиг дөннлһнә туск төр хәләгдв. Иим ветеранмудыг талдан дәәнә орлцачла әдлцүләд, цуг ольгот өгх төр тәвгджәнә. Ода сүүр олз-туста болн көдлмшч таалд болжана. Бичкн төр болв чигн, энүг заканла ирцүлж хәләхәр депутатнр шунж көдлжәнә.
Арвн йисдгч конференцд социальн политикин, номин, сойлын болн эрдм-сурһулин ЮРПА-н комитетин шин хань тогтагдв. Энүг олн-әмтнә депутат Бадм Салаев һардв. Хальмг танһчин депутатнр олн-үзсн седвәр орулж өгв, тер тоод цаажла харһсн улсин социальн дөннлһнә төриг федеральн кемжәнд орулһна болн шишлнг жилишн сангин заканд сольвр орулһна туск төрмүд босхжана.
Хальмг танһчин олн-әмтнә депутат Бадм Салаевин келсәр, эн саамд хальмгин депутатнр цаадла харһсн улст жилишн льгот федеральн бюджетас өгхин туск төр босхжана. Ода ЮРПА-н ниицәнә нерн деерәс Әрәсән Госудасртвенн Хүүвд дуудвр белджәнә. Жилишн заканд сольвр орулгдад, тенд цаажла харһсн улст льгот өггдх зөвтә.
Эн жил Сталинградск дәәлдәнә далн жилин өөн темдглгдв. Конференцд орлцачнр Сталинград нертә шин кинофильм хәләв. Волгордаск областин Думин орулж өгсн седвәр дунд хәәврин көдлмш кех седвәр бәәнә. Конференцин чилгчәр Волгоградск облатсин Думин ахлач Владимир Ефимов оурлж өгсн седвәрмүдин тускар ухан-тоолврарн хувалцв. Энүнә темдглсәр, цуг седвәр цаглань орулж өггджәнә.
Волгогрдаск областин Думин ахлач Владимир Ефимовин келсәр, иим сүрүт региональн парламентин орулж өгсн цуг седвәр тоод авгдж, хәләгджәнә. Иим седвәрмүж ик чинр зүүжәнә. Депутатнр сунһачнрин хаһлх төрмүдт ик оньг өгчәнә.
Батан Санжирма, Хулхачин Николай
