Яшлт селән зун һучн тавн жилин өөнән темдглв

Яшалтан бәәрн улс селән 1З5 жил хооран бүрдәгдснә өөнән темдглв. Селәг эстонск келн-улс тогтав. Түрүләд селән Эсто-Хагинка нер зүүв. 1956-гч жилд энүнд Яшалта гидг нер өгв. Өдгә цагт Яшалтад З0 келн улсин элчнр бәәршлжәнә.

Хальмг танһчин хамгин кезәнк селәдин негнь — Яшлт. Энүнә туужнь зун һучн тавн жил хооран эклсмн. Тиигхд нааран түрүн болж эстонцнр ирж бәәршлсмн. Тер жилмүдт селәнд түрүн школ болн чонж тосхгдв. Яшалтан района ахлач Яков Рерихин келсәр, эстонцнр нааран нүүж ирәд, хөрн дөрвдгч жил күртл библиотек, школ болн чонж бәргдв. Энүнә хөөн жирдгч жиләс авн хойр минһдгч жил күртл энд һол тохлтс кегдв, ода энд больниц болн школмуд көдлжәнә.

Өдгә цагт Яшалтан района цутхлнг селәнд арвн минһн күн бәәршлжәнә. Энд олн келн-улс хоорндан ни-негн бәәнә. Ода селәнд хальмгуд, орсмуд, немшнр, курд, дагестанцнр, азербайджанцнр, армян келн-улсин элчнр бәәршлнә. Хальмг танһчин олн-әмтнә хуралын ахлач Анатолий Козачко келсәр, Яшлт селәнд хамгин олн келн-улс бәәнә. Эднә сән күцәмж байр үүдәнә. Иргчдән энд бәәх улс хоорндан ни-негн бәәтхә. Кесг жилдән эдн хамдан түрү-зүд дааһад һардг бәәсмн.

Эн жилин зунар һан халун болсн бйинь, Яшалтан района селәнә эдл-ахун көдләчнр буудя му биш урһц хураж авч чадв. Ут-тоодан энд тәвн минһн тонн буудя цокж авгдв. Танһчин олн-әмтнә хуралд Хальмг танһчин толһачин элч Виталий Дагиновин келсәр, зунын кемд цуг тәрәчнр чидлән нөөлго көдлв. Виталий Дагиновин темдглсәр, энд бәәх әмтн цугтан эврәннь төрскн һазртан дурта болад, иим сән үзмж бәрж чадв. Өвкнриннь уул авьяс зангшал хадһлад, ода танһчин цуг улсла хамдан бәәхтә жирһлин төлә шунж көдлжәнә.

Байрин өдр деерәс асхад хур орв. Тер бийнь иим тенгрин бәәдл олн улсиг байр һундасн уга. Района селәнә муниципальн бүрдәц болһн эврәннь хамгин сән күцәмжән үзүлв. Энд урн һарин кегдлмүд, хот-хол болн селәнә эдл-ахусин өсксн мал болн урһаж авсн тәрән олн әмтнә оньгт тәвгдв. Байрин йовудт артистнр концерт үзүлв, гиичнр хулан хотар тоогдв.

Арстана Светлана, Очра Сергей