Яшкулихн Бузга үвлин кемд заһс бәрлһнә марһанд орлцв
Сүл өдрмүдт тогтсн киитн өдрмүдт үвлин кемд заһс бәрдг улст сән таал өгв. Ода зузан мөсн тогтад, иим улс танһчин усна боодгудт болн һолмудт одад, сул цаган олз-тустаһар давулж чадх. Келхд, ода зәрм райодт үвлин кемд заһс бәрлһнә Хальмг танһчин чемпионатын шүүврин девснг болжана. Энүнә тускар эндр региона заһс бәрлһнә спортын ниицән зәнглв. Яшкулихн Бузга нуурт дөрлдв. Заһс бәрлһнә марһанд орлцачнр хойр частан дөрлдв.
Марһа бүрдәсн хальмгин заһс бәрлһнә ниицән спортсменмүдт дөрлдә кехин төлә зокала хойр час өгв. Соньн марһан шишлнг әнгүдәр болв. Тегәд заһсчнр түрүләд, заһс бәрх бәәр шүүж авад, нүн мөснд бурһудх зөвтә бәәсмн. Нег үлү, иим һурвн нүкн кергтә. Хамгин түрүнд заһсиг хотлна. Хойр часин эргцд хамгин икәр заһс бәрх даалһвр өггдв. Хальмг танһчин заһс бәрлһнә ниицәнә олна организацин элч Эрдни Цатхаевин келсәр, спортсменмүдиг полуфиналд орлцх үрвр кегджәнә. Ода Яшкулихн эн туст нүүрт йовна. Болв Үстин района заһсчнр бас сән үзмж бәрж чадх.
Марһан болсн өдр киитн хөрн градуст күрәд бәәв. Тер бийнь Яшкульск района спортсменмүд дөрлдәнд шунмһаһр орлцв. Эн саамд мөсн ик зузандан көрв, нег үлү салькн уга чилгрн өдр болв. Дәкәд болхла Хальмгин МЧС-ин харсачнр әәмшг уга бәәдл теткв. Хальмг танһчин МЧС-ин харслһна церглтин ахлач Константин Сорокина келсәр, иим цагт зас бәрдг улсиг бүткх кергтә. Энүнә төлә олн-зүсн эв-арһ олзлж көдлжәнәвидн. Тегәд үвлин кемд заһсчнр күнд таалд туслха нөкд болхдан МЧС-ин көдләчнр белн бәәнә.
Дөрлдәнә ашт Хальмг танһчин товчлгч марһанд Яшкульск районас тавн спортсменмүд эврәннь района нер харсхмн. Эн дөрлдәнә ашар болхла хамгин олн заһс Василий Бяткиев бәрж авч. Тер мет Юрий Гадыков бас сән үзмж бәрв. Яшкульск района спортсмен Юрий Гадыковин келсәр, ода Бузга нуурт альд болв чигн заһс бәрж болх. Зунын кемд болхла, иим таал уга. Зунд зуг нуурин көвәһәс эс гиж онһцар заһс бәрж болна. Ода болхла мөсн зузан. тер бийнь иим кемд заһс бәрж болна.
Дөрлдәнд орцлсн цуг әмтн иим кеәвр суг цагас давулснд икәр байрлв. Эднә келсәр, кедү заһс бәрснь дегдик чинр зүүхш. Цевр аһар кииләд, нәәжнрләһән болн таньд улсла харһад бүлән-күр күүндвр кехлә эннь чеежин сергмж өгнә. Хальмг танһчин үвлин кемд заһс бәрлһнә товчлгч дөрлдән болхла февралин хөрн зурһанд болх.
Бевина Мергн, Жамбин Дмитрий
