Яшкульд седвәрч әмтн олн келн-улсин бииһин баг тогтаһад, бәәрн улсиг билг-эрдмәрн байрлулжана
Яшкуль селәнд билгтә седвәрч әмтн олн келн-улсин бииһин баг тогтаһад, бәәрн улсиг билг-эрдмәрн байрлулжана. Хойр сарин эргцд ансамблин ханьд оржах күүкд олн-зүсн талын келн-улсин би дасж авад, үзүлжәнә.
Келн-улсин бииһин баг бүрдәх санан Цаһан Басанговад цөн сар хооран орв. Энүнә седвәриг энүнә урдк сурһульчнр дөннәд, багшдан урмд өгв. Цаһан Басангован һарджасн Альфа нертә бичкдүдин үүдәлтин негдлтд бичкндән эдн бииһин эрдм даасн бәәж. Ода болхла эдн өсәд-босад, өрк-бүлән тогтав. Тер бийнь дурта эрдмән хайлго көдлн бәәж, бииһин эрдмәрн олн улсиг байрлулжана. Шинәс тогтагдсн баг цөн сардан көдлжәсн бийнь, ода билгтә күүкд арвн би белдж үзүлжәнә. Тер тоод тюрк, испаня, төвдин болн кельт келн-улсин би дасж авч чадв. Тер мет эдн багин орлцачнрин хамгин дурта индин би бас биилжәнә. Эднд Цаһан дөн болад, соньн эдм дасж авхд түшг болжана. Дәкәд болхла багин һардач концертн хувц-хунрин эскиз белднә, урн һарта орлцачнр Цаһан Басанговад һардврт эврән хувц-хунр уйж һарһжана. Цаһан Басангован келсәр, олн-зүсн би болн хувц хунр дотран санад үүдәх кергтә болна. Зәрмдән нам би зүүднд орна. Нег дәкж Ноһан Дәркин би зүүднд орв. Тер мет кельт улсин би бас зүүдлв. Олн-зүсн би толһад орна. Ода ансамблин орлцачнр иим би биилжәнә.
Күүкдин келсәр. олн-зүсн келн-улсин би биилхлә. өвәрц болн соньн болна. Селән һазрт бәәх улс иим кевәр сул цаган сергмжтәһәр давулсн деерән, бәәрн улсиг билг-эрдәмәрн байрлулжана. Багин орлцачнрин тоолврар, олн келн-улсин бииһәр дамжулад, өвәрц сойлын болн авг-бәрцин тускар медж авх арһ бәәнә. Тегәд чигн эднә концертиг яшкулихн болн района гиичнр ик оньган өгч хәләнә. Цаһан Басангован келсәр, ода нурһлж олн-зүсн келн-улсин би, тер тоод хальмгин би биилх санан бәәнә. Иим би ик кезәнәс авн биилх саната бәәж. Энүнә төлә соньн көгжм олж кергтә болна. Дәкәд болхла ке-сәәхн хувц-хунр бас чееж сергәнә.
Ода деерән бииһин багин ханьд зуг тавн күн орлцжана. Ода бәәрн селәнд иим бииһәр соньмсжах улс дала. Зуг эдниг цугтаһинь эврәннь багдан орулж авдг арһ уга. Бичкн коллектив ода деерән уутьхн школын студьт көдлжәнә. Долан хонгт һурв дәкж көдлмшин хөөн, герин көдлмшән кечкәд, күүкд нааран ирж дурта эрдмәрн көдлж чеежин сергмж авчана. Ансамблин орлцач Айса Сариеван келсәр, хамгин түрүн би гиснтн спорт болжана. Хойрдар болхла, иим кевәр сул цаган давулжана. Иим эрдм йир олз-туста. Бичкдүд бас иим би дасх саната бәәнә. Дорас өсж йовх баһчуд художественн болн көгжмин школд одна. Болв нанд би хамгин икәр таасгдна гиж Айса келнә.
Иргчдән бичкн коллектив эврәннь района селәдт болн танһчин талдан поселкст одад концерт үзүлх зурата бәәнә. Нег үлү, эдн талдан чигн келн-улсин би биилх саната, тер тоод эрк биш эврәннь хальмгин бииһән мартлго биилж өгх күцл тәвжәнә.
Пихона Нина, Очра Сергей
