Яшкуль селәнд уснд авлгдсн уульнцс харсж авгдх

Яшкуль селәнә улсиг кесг жилдән һазр дорас һарчах усн ик зовлнг учражана. Ода эн хруц төриг экләд хаһлх шиидвр авгдв. Танһчин йиртмжин көрнгин болн эргндк аһу харслһна министерств болн танһчин правительств проектн-сметн документац белдлһнә төлә мөнг йилһж өгв. Ода эн көдлмш күцәх организац темдглж авгдв.

Яшкуль поселкд сойлын гер далн дөрвдгч жилд секгдсн билә. Энүнд дегц зурһан зун күн багтна. Сойлын герт олн-зүсн байр болхла яшкулихн олар цуглрна. Зуг сүл жилмүдт сойлын гериг һазр дорас һарчах усн авлад, гер эвдржәнә. Энүнәс көлтә гер жил ирвәс дорагшан сууһд, эрс шуурад, пол өмкрад үржәнә. Ода һазр дорас һарчах усиг сцен деерәс авч болна. Энүнә төлә энд оньдин суулһ бәәнә. Давсн һашун ус ууж болшго, зуг пол уһаж болх гиж бәәрн әмтн шоглна.

Яшкуль селәнә сойлын герин диреткорин үүл даажах Борис Цандыковин келсәр, сойлын гер иим бәәдлд бәәх зөв уга. Эврәннь чидләрн һазр дорас һарчах усиг водовоз машиһар сорж үзләвидн. Болв эннь нөкд болсн уга. Гер сууһд нурх әәмшгтә. Үвлднь киитн болна. Ода эн төр энд йир хурц төрт хүврв.

Тер мет Яшкульск района администрацин гер бас иим күнд бәәдлд тусв. Энүнә подвалд усн дүүрнг. Урднь подвалд көдләчнрин төлә столовь көдлжәлә. Дәкәд болхла Яшкуль селәнә бәәрн улсиг гермүд бас уснд авлгджана. Һазр дорас һарчах усн урһмл моднд му нилчән күргжәнә. Модн сәәнәр урһжахш. Селәнә улс һаруд болн сад тәрж чаджахш.

Яшкульск СМО-н толһач Владимир Лиджиевин келсәр, ода селәнә улс һазрас һарчах уснас көлтә икәр түржәнә. Суулһсн модн үрж одна. Урһмл модна унгнь үрж одна. Зәрм һазрт модж суулһж болжахш.

Иим күнд бәәдлд селәнд хөрн жилин эргцд тогтжана. Усар хамгин икәр авлгдсн хойр уульнцин әмтн найдгч жилмүдт талдан һазрт нүүх кергтә болв.

Яшкульск СМО-н толһач Владимир Лиджиевин келсәр, урдк жилмүдт һазр дорас һарчах усн ик зовлнг учражасн уга, ода сүл арвн жилд күнд бәәдл тогтв. Бәәрн әмтн арһ уга талдан һазрт нүүж одв. Энд усна цувг татснас көлтә иим бәәдл тогтсн бәәдлтә. Хойр уульнц уг аболж одв. Әмтн гермүдән цуцуд талдан һазрт бәрв.

Ода Яшкуль селәнд кесг уульнцин гермүд уснд авлгдх әәмшгтә. Һурвн зун өрк-бүл эврәннь гермүдән болн зөөрән геех ик әәмшгтә бәәнә.

Яшкульск РМО-н администрацин толһачин жарук Галина Шининован келсәр, уснд авлгдх әәмшгтә уульнцс ода олн. Ода тавн уульнц әәмшгтә бәәдлд тусв. Тер тоод Лопатина, Северная, Клыковин нертә уульнц түрү бәәдлд бәәнә.

Иим күнд бәәдл ясрулхин төлә ирлцнһү керг-үүлдврмүд экләд күцгджәнә. Селәг уснас харсж авхин төлә проектн-сметн документац белдж авхин төлә танһчин йиртмжин кшрнгин министерств мөнг йилһж өгв. Марһана ашт иим көдлмш күцәх предприять йилһрв. Эннь Гидропроект нертә ниицән. Энүнә көдләчнр дор ормднь одад, Яшкульск администрацин толһачла һазрас һарчах усна төр хаһлхин тускар күүндв.

Яшкульск РМО-н администрацин толһачин дарук Галина Шининован келсәр, района администрацин һардврин нилчәр эн төриг оньдин босхнавидн. Ода эн туст көдлмш кегдх, керг дор ормасн көндрв. Энүнә төлә танһчин правительств болн йиртмжин көрнгин министерств нәәмн дундур сай арслнг йилһж өгв.

Проектн-сметн документац эн жилин октябрин чилгч күртл белн болх зөвтә. Эн цагин эргцд көдлмшч баг Яшкуль селәнәс һазр дорас һарчах усна төриг яһж хаһлхинь темдглж авх зөвтә. Эднә зураһар иим көдлмшиг хойр девснгәр күцәх кергтә. Түрүләд дренажн систем бәрх кергтә, дарунь ус йовулх систем энд кергтә.

Елена Алексенко, Котина Валерий