Яшалтинск районд тәрәчнрин байр болв
Района тәрәчнр көдлмшин ашан диглв. Яшалтинск районд селәнә эдл-ахун көдләчнрин байр болв. Района стадионд олн фермермүд цуглрв, тер тоод района хамгин хол селәдин элчнр ирж, нәр-нааднд орлцв. Мана үүдәгч баг селәнә улсин байриг хувалцв.
Өрүн эртәс авн Яшалт селәнд олн әмтн цуглрад, шуугад байрлв. хамгин икәр бәәрн фермермүд байрлцхав. Октябрин эклцәр тәрәчнр көдлмшөин ашан диглж авна. Эн жил тәрәчнрин болн малчнрин көдлмш сән үзмжтә болв. Селәнә эдл-ахун продукцан үзүлхин төлә фермермүд Яшалтинск района поселк болһнас ирв. Татьяна Гапотченко келсәр, селәнә эдл-ахун көдләчнрин байрт цуг селәһәр белдвр кев. Күүкд улс гертән өдмг болһв, урн һарта эрдмчнр ке-сәәхн кегдлмүд кецхәв. Гапотченкон өрк-бүлин ишкә гер туульмудын дрмүдәр кеерүлгдв. Татьяна Гапотченко келсәр, мана урн һарта әмтн ке-сәәхн кегдлмүд кенә. Тууляр дамжулад, олн-зүсн соньн үүдәврмүд кеж һарһв. Тер тоод зес уулын эзн күүкд күн, Аленушка болн энүнә дү Иванушка болн нань чигн тууль олзвидн. Олн-зүсн өдмгин зүүтә әмтән хот-хол үзж болх, тер тоод балта келәвидн.
Урдаснь белдсн ке-сәәхн стендмудт темсн болн зер-земш тәвгдв, намрин цецгүдәс болн талдан чигн материалмудас соньн композиц кегдж. Хамгин сәәхн болн амтта өдмг болһсн дииләчнр гиичнрт белгән бәрүлж өгв. Района тәрәчнриг танһчин һардачнр сән күцәмж бәрснд ик ханлтан өргж, йөрәв. Хальмг танһчин правительствин ахлач Людмила Иванован келсәр, зунын кемд күнд көдлмш кеһәд, сән үзмж бәрсн улст ик ханлтан өргх зөвтәвидн. танһчин болн района һардачнр эднә көдлмшиг күнднә. Яшалтинск район буудян урһц хураж авлһнд ик тәвцән орулв.
Энүнә хөөн селәнә эдл-ахун нүүрлгч көдләчнриг йөрәв. Зунын кемд буудян сән урһц хураж авсн фермермүд болн района эдл-ахусин дунд болсн марһана дииләчнр күндлһнә һашгудар болн үнтә мөрәһр ачлгдв. Фермерск эдл-ахус толһач Евгений Дерипаско келсәр, иим сән күцәмж бәрснд механизатормуд болн цуг специалистнр ик тәвцән орулв. Энүнд зуг мини ач-тус биш, цугтан сәәнәр көдлв. Танһчин министерствас иим мөрә авсндан байрлжанав гиж Дерипаско келнә.
Келхд, эн жил мөрә сән болв. Буудчн урһц хураж авсн марһан түрүн орм эзлсн тәрәс хөрн минһн арлснг мөнгнә мөрәһәр ачлгдв. Нәр-наадн төгсхлә, фермермүд көдлмшән цаарандан кех. Эн өдрмүдт намрин тәрә тәрлһнә көдлмш күцәгджәнә. Цаг үрәлго, чилгр өдр олзлад, иргч урһцин төлә чидләни нөөлго көдлх кергтә.
Азыда Надежда, Жамбин Дмитрий
