Яшалтинск районд хойр социальн обьект эдлврт орулгдв

Яшалтинск районд капитальн ясврин хөөн хойр ик чинртә социальн обьект Красномихайловское селәнд бичкдүдин сад болн Эсто-Алтайск дундун школ эдлврт орв. Байрин керг-үүлдврт танһчин толһач Алексей Орлов орлцв. Эн байриг бәәрн әмтн ик кезәнәс авн күләжәсмн.

Яшалтинск районд бичкдүдин садт орх көвүд-күүкдин чеерд ода чигн ик. Тегәд чигн Красномихайловское селәнд дошкольн учреждень секхинь ик кезәнәс авн күләжәсмн. Бичкдүдин сад энд хөрн жилдән көдлсн уга. Ода энүнд һучн көвүн-күүкн орж чаджана. Эндр өдрт болхла хойр насни багд хөрн бичкдүд оржана. Бичкдүдин садын гер шинрүлж ясхин төлә федеральн болн бәәрн бюджетмудас тавн дундур сай арслнг йилһж өггдв.

“Светлячок” нертә бичкдүдин садын һардач Елена Кобылатован келсәр, ода бичкдүдинс адлын цуг көдләчнр бәәнә. Хойр сурһмжлач көдлжәнә. Шин оборудовань углж тәвгдв. Шин мебель бәәнә. Хот кедг һазрт бас шин оборудовань хулдж авгдв.

Эсто-Алтайск дундын школын гер ясхин төлә арвн негн сай арлснг кергтә болв. Энүнд герин ора шинрүлгдв, терз-үүдн сольгдв, дула өглһнә автономн систем углж тәвгдв, котельна хуучн герт хот-уудг хора бәәнә. Ода школд сурһуль дигтә-даратаһар күцәгджәнә.

Көглтин Даван нертә Эсто-Алтайск школын директор Галина Сасыкован келсәр, ода школд зун найн сурһульч сурчана. Сентябрин нег шинд сән белг тосхачнр кев.

Танһчин толһач Алексей Орловин келсәр, тосхачнр шинрүлһнә ясврин көдлмш сән чинртәһәр кеж. Бичкдүд байрта бәәнә. Тас талдан таалд сурчана. Хораст дулан сарул. Туалет бәәнә. Эннь бичкдүдт сән таал болжана. Танһчин цуг райодт темдглсн зура күцәгджәнә. Шин школ бәрх зура бәәнә. Бичкдүдин садмудт чеерүд уга кех кергтә. Ода эн төр темдглсн зураһар күцәгджәнә. Тер мет багшнрин жалв икдүлх төр тәвгджәнә.

Бевина Мергн, Котина Валерий