Яшалтинск района школмуд дула өглһнә шин систем олзлжана

Күч әрвлһнә танһчин программар Яшалтинск районд художественн школын болн бичкдүдин иүүдәлтин цутхлнгин гермүд автономн дула өглһнә системд орулгдв. Района эрдм-сурһулин учрежденьст дула өглһнә систем шинрүлһнә төлә ик көдлмш күцәгдв. Бәәрн бюджетас энүнә төлә нег сай хойр зун минһн арлснг йилһж өггдв.

Хуучн бешмүдиг суһлад авчкв. Художественн школын директор Людмила Басангован келсәр, зуг эдниг ода зөөж һарһж чадсн уга. Хуучн хәәсн кезәнә эвдрәд, эдлврәс һарв. Художественн школын коллективд шин хәәс углж тәвснь йоста сән белг болв. Ода шин бешин күчәр школын цуг герт дулан өггдх. Давсн үвләр түлә олзлснд дал мөнгн һарв.

Художественн школын директор Людмила Басангован келсәр, эн жил района администрац сән белг кеж. Школын герт шин хәәсн углж тәвгдв. Хуучн хәәсн эвдрәд, мууһар дула өгчәлә. Шин хәәсн дула сәәнәр өгнә. Давсн жилд газ олзлснд дала мөнгн һарв. Эннь района цуг школмудар ик мөнгн болж һарв. Района бюджетд күнд болна. Эн жил газ әврнәр олзлгдх гиж санжана.

Яшалтинск района толһачин дарук Николай Скляровин келсәр, иим шин хәәс тәвхлә дала мөнгн һархш. Электрокүчн әрвлһнә программар Яшалтинск РМО нег сай арлснг йилһж өгв. Ода коммунальн туслмжин мөнгн әрвнәр олзлгдх. Һаруһин мөнгн ахр болзгт данцагдх. Района талдан эрдм-сурһулин учрежденьст болхла бас ясврин көдлмш кегдв. Үлгүрнь, Красномихайловск дундун школд дула өглһнә сурвлж шинрүлгдв.

Яшалтинск РМО-н толһачин дарук Николай Скляровин келсәр, үвлин кемд район йирн — йирн тавн процентд белн болв. Электрокүч әрвлһнә программар Красномихайловск школд дула өглһнә системин турвас сольгдв. Тер мет дулана кемжә тоолдг прибор шинрүлгдв. Иим нег приборнь тәвн минһн арлснг күрнә. Цуг котельнсиг даатхлһнд орулв. Эннь газ әрвнәр олзлхд сән нилчән күргх. Иргч жилд темдглсн зураһар Яшалтинск дундын школыг болн Березовск селәнә школыг автономн дула өглһнә системд орулх санан бәәнә.

Ода художественн школын багшнрин коллектив эврәннь учрежденя материальн-техническ ул батрулж чаджана. Ода сойлын учрежденьсиг шинрүлһнә программд орлцхин төлә проектн-сметн документац белджәнә. Котельня шин хәәс углж тәвснә хөөн, сурһульчнрт кергтә шин мольберт болн планшеткс хулдж авгдх. Иим оборудовань бичкдүдт сурһульднь кергтә болна. Уйн наста зурачнрин келсәр, хуучн оборудовань эвдрж одв.

Эн күүкнә келсәр, шин мольберт болн планшеткс хулдж авх кергтә. Ода олзлжах оборудовань хуучрв. Дәкәд болхла художественн школд шин мебель бас кергтә.

Художественн школын коллективин тоолврар, сойлын халх шинрүлһнә программ күцәгдхлә, эднә олн-зүсн хурц төрмүд хаһлгдх. Района муниципалитет болхла иргч жилд района дәкәд хойр школыг дула өглһнә автономн системд орулхар зуралжана.

Батан Санжирма, Хулхачин Николай