Январь сард ямаран тенгрин бәәдл тогтх

Январь сард тогтсн дулан өдрмүд атмосферн фронтас көлтә мана танһчд болв. Ода эн фронт мана регионас һарч йовв. Талдан ирсн фронт киитн өдрмүд тогтах. Иргч өдрмдүт цасн орда, салькна күчн чанһрх, хаалһс мөстх.

Элст балһсн хойр өдрин эргцд йоста үвлин бәәдл һарв. Урһа моднд болн гермүдин ора деер цасн овалһата, хаалһс мөств. Болв хур орад, дуларснас көлтә уульнцд хальтрта болв. Иим таалд дамшлтта жолачнр сагар машиһарн йовжана.

Эн жолачин келсәр, машиһар йовхд күнд болв. Цасн оржаһад, хур орна. Шинкн маши залжах улс иим кемд йовх керг уга. Уульнцд машид дала. Өмнән йовх машинас заагтаһар йовх кергтә гиж эн жолач келнә.

Тер бийнь мана танһчд хаалһст зеткртә йовдлмудын то өсәд йовна. Травматологическ цутхлнгд медицинск дөн авхар ирсн улсин то икдәд йовна. Нег үлү, өрүн кемд нааран олн улс ирнә. Эдн нурһлж һар-көлән булһрна, зәрм әмтн көл — һаран чигн хамхлна.

Танһчин больницин травматологическ цутхлнгин дежурн эмч Екатерина Бедишеван келсәр, урдк кевәр көдлжәнә. Һаза йовх улс хаалһар болһамжтаһар йовх зөвтә. Медәтә улс һанцхарн йовх керг уга эс гиж резин үзүртә тайг олзлх кергтә.

Хаалһс мөстсн кемд болһажмжтаһар йовх кергтә гиж специалистнр селвг өгәнә. Иим цагт сагар бәәж, мөстә хаалһар адһлго йовх кергтә. Үвлин кемд хальтрата биш һос башмг өмсх кергтә. Башмгин улд төмр эс гиж паролон нааж болх. Медәтә улс резин үзүртә тайг эс гиж төмр үзүртә шишлнг мод олзлх кергтә. Элстихн иим кемд яһж әәмшг угаһар йовхин тускар меднү аль угай? Иим сурврт эдн иигж хәрү өгв.

Эн күүкд күүнә келсәр, һаза һарлгон бәәж болшго. Зуг саг бәәх кергтә. Эн көвүнә келсәр, хаалһиг оньган өгч шүүж авх кергтә, мөстә хаалһар йовхмн биш. Хаалһиг болһамжтаһар керчх кергтә. Эн күүкнә келсәр, хальтршго башмг өмсх кергтә. Башмгин улд лейкопластырь наадгин тускар сонсж.

Мана танһчин аһуд киитн фронтас көлтә аһарин кемжән киитрв. Өцклдүр орсн цасн көрәд, хальтрата хаалһд хүврв. Иргч өдрмүдт цаарандан чигн киитрх. Өдртнь аһарин кемжән ннәмн градус киитнд күрх, сөөднь арвн һурвн градус киитн болх.

Хальмгин гидрометеоцутхлнгин синоптик Надежда Мучаеван келсәр, өмн үзгәс ирсн циклонас көлтә мана танһчд хур-цасн орв. Танһчин ар үзгин райодт цасн орад шуурһн шуурв. Ода аһарин кемжән киитн биш. Иргч амрлһна өдрмүдт болхла аһарин кемжән сөөднь арвн —арвн тавн градус киитнд күрх. Зәрм ормар хөрн градус киитн болх. Өдртнь зурһан — арвн негн граудс киитн болх.

Мана танһчин аһуд иим тенгрин бәәдл дарук хонгт бас иим болх. Тегәд танһчин әмтн сагар бәәж, эврәннь эрүл-мендин тускар мартх зөв уга.

Елена Алексенко, Эрнжәнә Эрднь