ВИЧ гемәр гемтсн бичкдүдин эк-эцкнр зарһин шиидврлә зөвшәржәхш
Хальмг танһчин бичкдүдин больниц һарһсн һару данцалһна туск керг хальмгин Деед Зарһин президиум хәләв. Дәкәд нег тодлад келхлә, нег минһн найн нәәмдгч жилд эн медицинск учрежденьд ВИЧ гем гемтсн бичкдүдин эк-эцкнр зарһд эрлһ орулж өгсн билә. Эмчнр көдлмшән болһамж угаһар кеснәс көлтә уголовн керг күцәгдв. Болв уголовн засгин болзг давснас иштә хойр минһн арвн негдгч жилин октябрин хөрнд уголовн керг зогсагдв. Гемтсн бичкдүдин эк-эцкнр зарһин шиивдриг яһж тосв, энүнлә зөвшәржәнү аль угай?
Ока, Вадим, Денис болн Виолетта сәәһән хәәж. Эдн талдан күүкдлә әдл наадг арһ уга билә, бичкдүдин садт болн школд орж чадсн уга. Эдн тас талдан жирһлин хаалһар бәәв. Кен эднд иим гем хальдасн тускар ода күртл медгджәхш. Нег үлү, ода энүнә учрин күн медж авхар седжәхш. Хөрн жил хооран кесг бичкдүд ВИЧ гем хальдасн йовдл илткгәд уга. Людмила Черноусован Виолетта күүкнь эн ик әәмшгтә гемәс көлтә арвн нәәмн настадан өнгрв. Арвн настадан энүнд эн гем хальдсн бәәж. Ода пенсионерк экнь ик зовлнгта бәәнә. Людмила Черноусован тодлсар, күүкнь оньдин уулдг билә. Яһад эс талдан бичкдүдлә әдл биш болжахмб? Көвүд-күүкд энүнлә наадлго зулдг бәәж. Эн жилмүдт ик өрнд унж. нәәмн жилин туршарт ик мөнгн һарв. Өгсн мөнгн энүг данцаж чадшго гиж Черноусова келнә.
Күүкнд иим му гем хальдасн улсиг олж автха гиһәд талдан эк-эцкнрлә хамдан кесг цаас Людмила Черноусова орулж өглә. Иим удан яһад эдн ә уга бәәсмб гиж зәрм улс сурх. Күүкднь күндәр гемнәд, үкжәсн цагт олн-зүсн инстанц эргәд гүүдг цол уга бәәсмн. Хам-хоша бәәх улсин му хәләц, элгн-садна арднь келсн үг сонсх ик теслт кергтә болв. Мария Шалдаеван келсәр, бәәдг гер уга билә. советин йосна цагт әмтн гер авдг билә. Селән һазрас ирсн улс гер уга үлдв. Ода хоосн үг өгнә. Хөрн жилдән гемтә улсиг олж авч аш. Зуг давсн жилд иим гем хальдасн улс гемән медж келв.
Дәкәд нег толдад келхлә, давсн жилин июнь сард эдн Элст балһсна зарһд эрлһ орулж өгсн билә. Тенд документинь авад, зуг кергинь зогсав. Эк-эцкнр һаруд унсн иткүлин документ авч иртн гиж зарһчнр келж. Иим иткүлин тогтавр зуг давсн жилин намрар өггдв. Өрк-бүл болһнд таваһад сай данцалһна мөнг өгх неквр эк-эцкнр зарһд тәвж. Элст балһсна зарһин шиидврәр, эднд зуг нег зун минһәд арлснг өггдх зөвтә бәәж. Иим шиидврлә зәрм эк-эцкнр зөвшәрсн уга. Өдгә цагт ВИЧ гемәр гемтсн далн дөрвн бичкдүдәс һучн дөрвн көвүн-күүкд әмд үлдв. Һаруд цөн эк-эцкнр унж гиж зарһ шиидв. Хальмг танһчин Деед Зарһд эрлһ орулж өгснә хөөн, өрк-бүл болһн данцалһна һурвн зууһад арслнг өгх болж һарв. Очр Шовгуровин келсәр, һурвн зун миһн арслнг өгснь мадниг нульмжах әдл мөнгн болжана. Ода һурвн зун минһн арслнг мөнгн биш. Эн мөнгәр санаторьт оддг арһ уга, эм хулдж авч болшго. Зәрм әмтн эврә гер уга. Шавр герт бәәнә. Иим ик зовлнг болжана.
Ода СПИД гемтә дөчн дөрвн күн сардан хөрн хойр минһн нәәмн зун дөчн дөрвн арслнг авчана. Арвн зурһан эк-эцкд болхла гемтә бичкүдт кимлж тусхахин төлә правительствас зурһан зууһад арслнг өггднә. Давсн жилд өнгрсн бичкдүдиг оршахин төлә арвн хойр өрк-бүлд дөчн хошаһад минһн арслнг өгч. Эн жил иим нәәмн өрк-бүл дөнцл мөнг авв. Блицы Евдокия Адучиеван келсәр, арһ уга күләх кергтә. Мадан өмн зарһд орсн улс һурвн сардан мөнгән күләж. Мөнг күләһә бәәж муурв. Иим бичкн мөнгн өдгә цагт юмнд күртшго.
Гемтә бичкдүдин эк-эцкнр бичкн диилвр бәрв гиж келж болх билә. Болв эн диивлр дегд үнтә кеәвр ирв, нег үлү иим шиидвр эдниг тас ханһасн уга.
Ээнән Делгр, Хавтхна Анатолий
