Удл уга орсин театр шин сезоһан эклх
Долан хонг болад шог наадна болн драмин орсин танһчин театр шин сезоһан эклх. Театрин коллектив эврәннь хәләһәчнртән алдр полководец Наполеона жирһлин сүл өдрин туск наад белдв. Ах режиссер Владислав Константиновин келсәр, күн болһна жирлһин хаалһд дурн ямаран орм эзлдгин тускар энүнд келгджәнә. Шин сезог болхла орсин театр Оньдин маднла бәәәдг байр нертә актер Александр Шегловин өөнин бенефисар эклх.
Шин театральн сезог артистнр маднла оньдин хамдан бәәдг байр нертә наадар секхмн. Әрәсән болн Хальмг танһчин ачта артист, орсин театрин тоомсрта актер Александр Шеглов тәвн жилдән дурта эрдмәрн көдлжәнә. Шин наадн-концерт энүнә билг-эрдмд болн театральн үүлдврт нерәдгджәнә. Маднла оньдин хамдан бәәдг байр нертә наадн театрин репертуарт орх. Актерин келсәр, энүнә үүдәлтд нерәдгдсн иим наадар сезок эклжәхнь ик күндтә болжана. Әрәсән болн Хальмг танһчин ачта артист Александр Шегловин келсәр, цаг яһж давснь медгдсн уга. Түрүләд баһ дүүвр насндан экләд театрт көдлж. Хөрн долан настадан Хальмг танһчд ирж. Жирлһин хаалһар йова йовж яһж дал күрсән медсн уга. Цаг дарунь өнгрв, ода деерән кех-күцәх керг дала.
Келхд Александр Шеглов Чехин драматург Иржи Губачин бичсн Корсиканка нертә шин нааднд бас нааджана. Энүнд нег минһн нәәмн зун арвн йисдгч жилин утскар келгджәнә. Әмтн мартсн император Наполеон сүл дәәлдәнд диилгдәд, йосан һартасн алдад, әрүн Елена арлд туугдж. Энүнә өөр генералмуд Бертран болн Гурго бәәнә. Эн кемд императорин бәәдл-жирһлнь дегд күнд, угатя кевәр бәәһәд, арлын һардачнр энүг дажрж, дорацулна. Зуг күүкд күн ирәд, энүнә жирлһинь байрлулна. Шин наадн йир ке-сәәхн кевәр тәвгдж. Һол дүриг Хальмг танһчин ачта артист Виктор Хаптаханов нааджана. Актерин келсәр, түрүн авгтан Наполеона дүрәс икәр әәв. Хальмг танһчин ачта артист Виктор Хаптахановин келсәр, Наполеона дүриг зуг хоосн зург гиж үзүлжәхш. Энүнә чеежд бәәх зовлнгнь соньн болв. Цуг эүнүг хәләһәчнрт медүлхәр зуткж. Наполеон соньн болн алдр күн бәәж.
Арлд тууврт бәәх улсин бәәдл-жирһлд генткн шин күн — Жозефина орж ирнә. Эгл крестьянкин йоснь нернь Эвлалия Понтиу. Хатна нер зүүхәр седж. Энүнә дүр нааджах Елена Бицунован темдглсәр, Жозефина өвәрц зангта күүкд күн бәәж. Иим кү наадхд амр биш болв. Хальмг танһчин ачта артистк Елена Бицунован келсәр, Жозефина уульжаһад, генткн инәнә. Дәкнәс инәһәд уулад чигн одна. Дөврн үртә күүкд күн ухата болн тевшүн күн. Нег минһн нәәмн зун арвн хойрдгч жилин дәәнд әмнәсн хаһцсн авальдан дурта бәәж. Эврәннь залуһиннь болн энүнә күндлжәх императориг хәләхәр ирж. Наполеониг күндләд, дурлдг билә.
Элст балһсна хәләһәчнрт шин наадн өвәрц болх гиж театрин художественн һардач Владислав Константинов нәәлжәнә. Онц темдглхд, шин сезонд театр талдан чигн олн наадд үзүлх саната. Шог наадна болн драмин орсин театрин художественн һардач Владислав Константиновин келсәр, эн жил Примадонна нертә наадн белдгдв. Ода театрт баһ наста артистнр ирв. Эднә төлә шин наад хәәжәнә. Приключение надежды и любви нертә үүдәвр бәәнә. Энүг тәвх зурата. Шог наадна болн драмин орсин театр шин сезонд хәләһәчнрән соньн наадар байрлулх саната. Тегәд театрин зариг оньган өгч хәләтн.
Ээнән Делгр, Колдан Церн
