Темсн болн зер-земш кимдржәну аль угай?
Тадн танһчин зәнг шуд эфирт хәләжәнәт. һарцан цаарандан өгчәнәвидн. Ода талдан төрмүдин тускар. Хальмг танһчин государственн статистикин федеральн церглтин территориальн органа сар болһн кедг шинжлтын ашар давсн сарла дүнцүлхлә, темснә болн зер-земшин продукцин, тер тоод боднцгин үн долан һар процентд кимдрв. Эн төрәр соньмсж мана үүдәгч баг негдгч микрорайонд бәәх темснә базрт одад ирв. Ода боднцг болн талдан чигн темсн кедү күрдгин тускар мана сюжетд келгджәнә.
Эн сард базрт тәрә темсн кимдрв гиж нег мөслж келж болшго. Стаитсикин то-дигәр болхла, тәрә темсн болн зер-земш зунын чилгчәр болн намрин эклцәр кимдрнә. Болв специалистнрин келсәр, темснә үн дегд икәр дорагшан орсн уга.
Хальмг танһчин статистикин федеральн церглтин органа әнгин ахлач Эльза Анджаеван келсәр, продукцин үнин шинжлтыг долан хонг болһн кенә. Давсн сарнг өдр тәрә темснә үн невчк баһрв. Эннь дав-уузрин керг болжана. Давсн сарла дүнцүлхлә, зер-земш болн темсн невчк кимдрж.
Эн өдрмүдт зунын кемд үвлд темс эс белдж авсн күүкд улс тәрә темс давслж үвлд белджәнә. Келхд, үвлд белдж авх хаяр зөвәр үнтәрв. Июнин эклцәр энүнә нег килограммнь арвн хйор арслнг күрдг бәәсн болхла, ода хөрн тавн арлснгас давжана. Тер мет зунын кем ирсн бийнь помидорин үн бас дорагшан оржахш. Ода нег килограмм помидор хөрн тавн һучн арслнг күрчәнә. Талдан базрт энүнәс үнтә. Супермаркетмудт болхал помидорин нег килограммнь һучн тавн арлснг күрчәнә. Хамгин кимднь — кабачки. Нег килонь арвн тавн арлснг. Тегәд базрт тәрә темсн үнтә болда үвлд белдж авхд күнд болжана гиж эслтихн келнә. Пенсионер Владимир Сорокин помидор болн боднцг нег арһлачас оньдин хулдж авна.
Пенсионер Владимир Сорокина келсәр, давсн жиллә дүнцүлхлә тавн арслнгд продукц кимдрв. Талдан арһлачнр бас продукцан кимдәр хулджана. Хөрн тавн-хөрн нәәмн арлснг. Гертән эврән хаяр урһж авна, зуг помидор хулдж авх кергтә болна.
Болв зәрм әмтн темснә болн зер-земшин үн хәләлго, хулдж авна. Зунын кемд олн әмтн икәр витамин идх саната. Тегәд чигн олн әмтн базрт одад, тәрә. темс болн зер-земш хулдж авна. Тәрә темснә продукцин үн альдас авч ирснлә бас залһлдата. Үлгүрнь, Ростовск областяс болн Краснадарас авч ирсн темснә болн зер-земшин үн кесг холванд ик болна.
Хулдач Джамал Магомедовин келсәр, давсн сард темсн энүнәс үнтә билә. Хаяр дөчн-тәвн арлснг күрдг билә. Арһлачнр хаалһин мөнг авна, бензина мөнг немнә. Хол һазрас авч ирсн продукц үнтә болна.
Әәдрхнәс болн Краснодарас авч ирнс зер-земшиг элстихн дурлж хулдж авчана. Килограммнь хөрн тавн арслнг күрчәнә. Продукцин үн кимдржәхш. Болв икәр үүмх керг уга. Хавстн болн боднцг сентябрь-октябрь сард олар авч ирж хулдгдна. Тегәд специалистнрин тоолврар, энүнә үн кимдрх зөвтә. Тер мет Элст балһснд давсн сарла дүнцүлхлә тәрән темснлә зерг такан өндгн, махн, урһмл тосн невчк кимдрв. Эннь специалистнрин тоолврар ах болзгт болдг кимдрлһн болжана.
Хот-хоолын эд-таврин, тер тоод әрк-чаһрин үн давсн жилин декабрь сарла дүнцүлхлә, зурһан һар өсв. Специалистнрин тааврар, иргчдән үн цаарандан икдх. Статистикин то-дигәр, ода Әрәсән өрк-бүлмүдин ик зунь эврәннь мөнгнәс ик зууһинь хот-хоолд һарһжана. Эн тоод тәрә темсн болн зер-земш кедү процент тогтажахнь келхд күнд. Юнгад гихлә өрк-бүлмүдин зәрмнь үвлд темс белдж авхш. Тер бйинь витамин әмтнд кергтә. Тегәд эврәннь мөнгнә кемжәһәр хулдх кех кергтә.
