Театральн марһан болв
Көглтин Дава, Стефан Цвейг, Санжин Бося болн Цветаева Марина, Роберт Рождественский болн Ольга Берггольц. Эднә үүдәврмүдиг Мини Һазр нертә актерск марһана орлцачнр умшж өгв. Иим марһан жил болһн бүрдәж давулгдна. Танһчин театральн хойр баг дунд болжах марһан һурвдад болжана. Тер бийнь энүг олн әмтн күләж хәләнә. Марһана йовудт артистнр жюрин гешүдиг өврүлхәр зүткнә, шин болн өвәрц билг-эрдмән медүлх күцл өмнән тәвнә.
Иим марһа бүрдәж давулдг зангшал ик кезәнәс авн тогтсмн. Болв сүл жилмүдт эн соньн дөрлдәнә тускар мартад ирв. Ода эн жиләс авн марһан шинәс сергәгдж, олн хәләһәчнр болн артистнр дунд ик чинртә марһанд хүвржәнә. Иим дөрлдәнд артистнр жюрин ханьд оржах дамшлтта артистнриг өврүлсн деерән, шин болн өвәрц билг-эрдмән үзүлх кергтә болжана. Үлгүрнь, Тамара Палтынова болн Байрта Манджиева Көглтин Даван болн Санжин Босян шүлгүд умшсн деерән, эврәннь үүдәврмүдән умшж өгв.
Валентина Немяева болхла бүкл соньн программ белдж. Эн артистк Марина Цветаеван, Роберт Рождественскийн, Ольга Берггольц болн Евгений Евтушенкон шүлгүд умшв. Марһана чанһ неквртә жюрин төлә марһанд орлцачнр зурһан номер белдж. Эн саамд жюрин ханьд танһчин нертә болн олн хәләһәчнрин дурта артистнр — Хальмг танһчин олн-әмтнә артистнр Иван Уланов, Сергей Мучиряев, давсн жилин марһана дииләч, шог наадна болн дармин орсин театрин артистк Юлия Бодрова болн Хальмг танһчин ачта артистк Татьяна Михеева эдн орв.
Хальмг танһчин ачта артистк Татьяна Михееван келсәр, марһана дииләч гран-при мөрәһәр ачлгдх. Эннь Москва эс гиж Санкт-Петербург балһснд амрх путевкар мөрәлгдхмн. Дөрлдәнд баһ наста артистнр болн дамшлтта актермуд орлцжана. Тегәд эдн әдл дөрлдәд, марһаг кеерүлв.
Артист болһнд хәләһәчнрин дурн болн эднә бүлән тосвр кергтә. Болв эдн иим марһана йовудт ик дамшлтта болн эрдмән сәәнәр меддг улсин шиидвр үүмәтәһәр күләнә. Тегәд чигн иим дөрлдәнд артистнр цуг арһ чидлән болн билг — эрмдән үзүлхәр зүткнә. Үлгүрнь, Эльза Бадмаева эн марһанд тохнята белдвр кев.
Актерск марһан жил болһн артистнрин эрдмин байрин өмн өргнд болна. Эннь байрт йоста сән белдвр болж һарна. Ода хойр театрин артистнр жил болһн нарта-делкән театрин сән өдрт соньн программ белднә. Ода энүнд белдврин көдлмш гүргүдән. Тегәд байрин өдр мартын хөрн доланд марһана дииләчнрин нерд медгдх. Эдниг жюрин шиидврәр ачлх.
Хавтхна Элла, Хулхачин Николай
