Танһчин премьер-министр Приютненск районд одв
Танһчин правительствин ахлач Игорь Зотов Приютненск районд көдлмшин кергәр одв. Тенд социальн ик чинртә обьектмуд тер тоод бичкдүдин сад, школ болн сойлын гер бүрткж хәләв.
Хамгин түрүнд танһчин правительствин ахлач района төрмүдин тускар соньмсв. Энд хаһлх хурц төрмүд дала, тер тоод хамгин һол төр болж бәәәрн улсин уудг усар тетклһнә төр хаһлх кергтә болжана. Ода уудг ус Дивное селәнәс бочкар зөөжәнә. Района хурц төрин тускар бичкдүд наада кежәнә. "Бамб цецг" нертә бичкдүдин садын көвүд-күүкдин хамгин дурта нааднь ус зөөдг маши кеж һарһна. Онц келхд, сүл хөрн нәәмн жилин эргцд энд нег чигн дәкж капитальн ясвр кегдәд уга. “Бамб цецг” бичкдүдин садын һардач Галина Еременко келсәр, садын гер хуучн. Дула өгдг автономн систем уга. Ясвр кех кергтә.
Тер мет бәәрн сойлын герт капитальн ясвр бас кегдәд уга. Энүг советин йосна цагт тосхсмн. Сүл дөрвн жилд энд дула өгдг систем көдлжәхш, тегәд герт киитн. Района цуг сойлын керг-үүлдврмүд һаза болна. Сойлын герин көдләч Ольга Маливанован келсәр, әмт ирхлә арһ уга сойлын герин өөр керг-үүлдрврмүд давулх кергтә болна.
Приютное селәнә школын герт болхла ода дулан. Энд цуг кергтә шин оборудовань бәәнә, тер тоод интерактивн самбр углж тәвгдв, хойр жил хооран сурһульчнр интернет экләд олзлв. Бәәрн бюджетин мөнгәр давсн зунар энд электрокүчнә сунһуг сольгдв, шин линолеум делггдв, терз-үүдн шинрүлгдв. Приютносе селәнә негдгч школын директор Ольга Медведеван келсәр, ода школын багшнрт көдлхд цуг таал бүрдәгдв. Эднд интерактивн самбр сән дөн болжана.
Тер мет ода Приютненск районд олн давхрта гермүдин капитальн ясвр келһнә федеральн программ сәәнәр күцәгджәнә. Олн давхрта жирн герәс дөчн герт сән ясвр кегдв. Келхд, эн жил Приютненск района ончта өөнән темдглх. Района далн тавн жилин өөн сентябрь сард темдглгдх. Ода районд зурһан минһ һар күн бәәнә. Танһчин правительствин ахлач Игорь Зотовин келсәр, ода район жил ирвәс делгрлт авчана. Олн давхрта гермүд яслһна программ сәәнәр күцәгдж. Хаһлх төрмүд чигн бәәнә, тер тоод социальн обьектмудт ясвр кех кергтә. Хамгин күнд төрнь уудг усар тетклһн. Эн жилин зун күртл цуг эн төрмүдиг хаһлх зура бәәнә. Правительствин халхас районд дөн күрггдх.
Арстна Светлана, Очра Сергей
