Танһчин хуралын комитетин сүүр болв
Эндр Хальмг танһчин олн-әмтнә хуралын бюджетин, экономическ политикин, арһлачнрин болн зөөрин комитетин сүүр болв. Энүнд арвн төрәр депутатнр күүндвр кев. Түрүләд эдн улсиг көдлмшәр тетклһнә региональн агентствин һардачин дарук Григорий Гайдабуран танһчин эдләчнрин хот-хоолын кемжәнә туск доклад сонсв. Әрәсән закаһар иим кемжән тавн жилд нег дәкж тоолгдна. Гайдабуран келсәр, ода эдләчнрин хот-хоолын кемжәнә үн шин эв-арһар тоолж һарһагдхмн. Ода хот-хоолын кемжән тоод авгдх. Урднь продуктын үн тоод авгддг бәәсмн. Иим кевәр эдләчнрин хот-хоолын кемжән арвн һурвн-арвн тавн процентд өсх. Тер мет эндрк сүүрт депутатнр патентн алвна системин туск төр хәләх. Иим систем арһлачнрт льгот өгх зөвтә, бәәрн бюджетмудт алвна кемжә икдүлх. Сүүрт талдан чигн төрмүдәр тодрха күүндвр кегдв.
