Танһчин билгтә дууч Улан Лиджиева эн жил зун нас зүүх бәәсмн

Хальмг танһчин ууһн артистк болн билгтә дууч Улан Лиджиева эн жил зун нас зүүх бәәсмн. Киитн хол Сиврт хальмгуд Улан Барбаевнан дуулсн ду сонсчкад, у-өргн теегтән күрсн мет болв. Өдгә цагт Хальмгин баһчудын ик зунь мана енгсг сәәхн хоолта Улан Лиджиеван дуулсн дуд сәәнәр медхш.

Эн өдрмүдт Улан Барбаевна Лиджиевнан зун жилин өөн күцх бәәсмн. Эн дуучин тускар өдгә цагт мана әмтн меднә аль угай?

Лижин Улан минһн йисн зун арвн хойрдгч жилд Әәдрхнә областин Камызәкс района Иванчук селәнд заһсч Барбы Качаеван өрк бүлд төрсмн. Минһн йисн зун һучн зурһадгч жилд баһ наста күүкн Әәдрхн балһсна искусствин техникум чиләһәд, төрскн һазрурн ирәд түрүн хальмгин театрт ирж көдлв. Хальмг Танһчин болн монһл орн нутгин олн әмтнә артистк Клара Сельвина баһ цагтан нертә, дамшлта аритсклә таньлдсн билә. Энүнә эк эцкнь билгтә күүкд күүнлә сиврүр туугдсн кемлә нег вагонд йовсн билә. Мана өрк бүл Лижин Уланд йир дурта бәәсмн. Красноярск крайод бәәхләрн цуг хальмгуд зуг эн күүкнә герт хурдг бәәсмн. Улан дуулхларн дангин төрскн һазриннь тускар дуулдг билә. Эндр өдр энүнә тускар хамдан көдлж йовсн артистнр бүлән үгәрн энүг санна.

Хальмг Танһчин әмтн нертә артситк Лижин Улана нериг эндр өдр чигн мартсн уга. Хамдан олн жилдән нег герт бәәсмн улс Лижин Уланыг сәәнәр меднә.

Хальмгудын туужд түрүн болж Лижин Уланд ачта артисткин цол зүүлгдсн билә. Тәәз деер һархларн Лижин Улан олн зүсн дүр күчтә кевәр наадг бәәсмн.

«Нүүдлә», «Агчин улан берк», «Сартг эрәтә сиитц», «Деләш» болн нань чигн дуд Улан Барбаевна цуг седклән өгч дуулсн билә. Улан Барбаевната әдл енсг сәәхн хоолта дууч һарад уга гиж эндр өдр келж болжана. Билгтә дуучин нерн олн әмтнә санлд мөнкинд үлдхнь лавта.

Аджин Светлана, Хулхачин Николай