Танһчин бичкдүдин больницд ясврин көдлмш кегджәнә
Ода танһчин бичкдүдин больницин деед үзгин әнгд шинрүлж яслһна көдлмш кегджәнә. Энүнә ашиг бичкдүд болн эднә эк-эцкнрнь эн жилин чилгчәр үнлж чадхмн. Намрин-үвлин кемд гемтә бичкдүдин то икдсн цагт, шинрүлгдсн больницд орм цугтаднь күртх. Ода болхла тосхачнр шалдарин, ширдлһнә болн талдан чигн көдлмш күцәжәнә.
Бичкдүдин больницин зурһадгч давхрт реанимацин болн анестезиологин әнг бәәнә. Тосхлтын организацин ах инженер Вячеслав Кикеевин келсәр, эн ик көдлмш кех кергтә. Нен минһн дөрвлжн метр аһуд эрсин плит тәвх делглх кергтә. Ода ясврин шинрүлһнә көдлмш дегц больницин дөрвн давхрт кегджәнә. Энүнә төлә танһчин бюджетас тәвн долан сай арлснг йилһж өггдв.
Тосхлтын организацин ах инженер Вячеслав Кекеевин келсәр, эндр өдрт арвн һурвн сай асрлнг ирв, эннь хөрн процент тогтажана. Өдгә цагт цуг монтажн көдлмш кегдв. Ода талдан шинрүлһнә көдлмш үлдв, коммуникац сольх кергтә.
Ода больницин герин цуг давхрт терз сольгдв, удл уга шин үүд тәвх, дула өглһнә, усна сурвлжна, вентиляцин болн электрокүчнә оборудовань углж тәвгдх. Тер мет герт лифт көдлх. Бичкүдин болн эмнүлин учрежденя көдләчнрт сән таал бүрдәхин төлә зәрм хорас шинрүлгдж, аһунь икдв. Онц келхл, эрс шалдлһна көдлмш техникин эв-арһар күцәгджәнә. Һарар иим көдлмш кехд жанһрта болн удан. Автоматизированн эв-арһ көдләчнрин күн көдлмш гиигрүлжәнә. Хамгин дамшлтта шалдач машинла әдл иим ахр болзгт шалдар эрснд кеж чалшго.
Менеджер Андрей Абакановин келсәр, һаран кеснлә дүнцүлхлә машин кесг холванд түргәр көдлмш кенә. Далн процентд кемжән икднә. нег машин дөврн шалдачин ормд көдлж чадх. Хойр зун дөрвлжн метр шалдарин көдлмш кеж чадх. Шалдарин көдлмшин йовудт пол бас кегдх.
Капитальн ясвр кежәх цагт гемтә бичкдүд больницин дорд үзгин ясвр кегдсн әнгд орулгдв. Ода зүнын кемд гемтә бичкдүдин то дегд ик биш. Бичкдүдин палатмудт цуг кергтә бәәцин таал бүрдәгдх. Гемтә улсиг эмнүлхин төлә больницд диагностикин, эмнүлһнә болн реабилитацин төлә өдгәц агин некврлә ирлцәтә оборудовань әнгст углж тәвгдх гиж больницин һардвр нәәлжәнә.
Танһчин бичкдүдин больницин ах эмч Руслан Каюковин келсәр, ода оперционн әнгд ламп сольх кергтә. талдан чигн диагностическ оборудовань кергтә. Лабораторин төлә шин оборудовань хулдж авгдв. Ода талдан чигн оборудовань кергтә болжана. Цуг эн төрмүдиг хаһлх саната.
Кесг жилдән зогсагдсн тосхлт танһчин толһачин седвәрәр шинәс кэлв. Цаглань мөнг йилһж өгснь бичкддүин больнициг шинрүлж яслһна көдлмшиг декабрь сарин чилгч күртл төгсәх арһ өгчәнә. Тегәд эмнүлин учреждень бичкдүдиг эн жилин чилгәр орулж авх саната.
Ээнән Ольга, Эрнжәнә Эрднь
