Танhчд өрк-бүлин сән өдр темдглгджәнә

Арвн йисн жилин туршарт Әрәсәд майин арвн тавнла өрк-бүлин сән өдр темдглгджәнә. Эн өдрлә нег-негән йөрәһәд, белгән белгләд, онц оньг тусхах кергтә. Зуг эндр өдр зәрм өрк-бүлмүд тиим нәр давулдг арһ уга болжана.

Спортын марһанд 4 өрк-бүл дөрлджәнә. Кармановихнә «Дельфины» нертә команд, Чимидовихнә «Уралан», Шапошниковихнә «Звезда» болн Хахлыновихнә «Быстрые кеты» нертә команд. Марһанд хәләхәр ирсн улсин тоод орлцачнрин үр-иньгүднь болн элгн-саднь ирсн бәәнә. Эдн цугтан эврәннь командан дөнннв. Владимир Шапошниковин келсәр, дөрлдәнә цуг девсгүд соньн болв. Зуг хамгин дурта бүслүр эргүлһнә марһан болв.

Эн марһанд орлцхин төлә, Владимир көдлмшәсн сурад ирв. Марһана ашар Шапошниковихнә өрк бүл һурвдгч орм эзлв. Кармановихнә өрк-бүл хойрдгч орм авч чадв. Диилвр болхла олн үртә Хахлыновихнә команд шүүж авв. Зуг команд болһн белгүдәр болн һашгүдар ачлгдв. Мендр Хахлыновин келсәр, эн часиг эрк биш гертән тәвх.

Нег үлү хойр өрк-бүлд социальн цутхлнгин көдләчнр хот-хоолта пакет бәрүлж өгв. Эн керг-үүлдврин бүрдәһәчнрин темдглсәр, эн сән өдрлә ирлцүлж Элст балһсна 47 өрк-бүлд хот-хол, хувц-хунр болн талдан чигн тоотс бәрүлж өггдх.

Светлана Хинееван келсәр, эндр өдр дөрвн зун йирн долан өрк-бүл эднә учетд бәәнә. Харм төрхд, эн өдрлә эднәс зуг 47 өрк-бүл нәәрт орлцв.

Эн өрк-бүлмүд орлцснь бас учрта гиж Хинеева келнә. Бюджетд баһ мөнгн болад, цуг өрк-бүлмүд нөкд болж чадхш. Зуг кемр күн болһн тиим өрк-бүлдмүд дөнгән күргхлә, эннь социальн цутхлнгин көдлмш өөдән чинртә гиж келж болхмн.

Азыда Надежда, Котина Валерий