“Сталинград” нертә фильм Элстин кинотеатрмудд үзүлгджәнә

Әрәсән кинотеатрмудт Сталинград нертә кинофильм үзүлгджәнә. Энүг цокж авлһн ВГТРК орлцв. Режиссер Федор Бондарчукин көдлмш “Аймакс 3Д” янзар үзүлгдх Әрәсән түрүн фильм болж һарчана. Эн өдрмүдт Элстин “Родина” кинотеатрт олн улс шин кино хәләхәр седжәнә. Дәәнә цагин туск шин кинон тускар ухан-тоолвррарн элстихн болн гиичнр хувалцжана.

“Сталинград” фильм хәләсн улс икәр үүмәд, ухан-тоолврарн хоорндан хувалцжана. Өдгә цагин эв-арһин нилчәр энүг хәләсн әмтн догшн дәәлдәнд орлцснла әдл болж медгдв. Эднд уульх инәх чигн саам учрв. Федор Бондарчукин келсәр, иим күцл кино цокж авхларн өмнән тәвсн бәәж. Энүгә хәләсн күн болһн догшн дәәлдән болсн балһсн бәәснлә әдл бийән тоолад, салдснрла әдл немшнрлә баатр-зөрмг кеәвр дәәлдснлә әдл тоолх зөвтә.

Актер Андрей Смоляковин келсәр, Сталинградск дәәлдән аһу ик чинртә. Догшн дәәнә хамгин сүркә дәәлдән гиж тоолгдна.

Актер Петр Федоровин келсәр, дорас өсж йовх баһчуд фишизмла болсн дәәнә тускар баһар меднә. Фильм цокж авсн улс болхла дәәнә тускар сәәнәр медж, зүркнднь хадгдж үлдв.

Кинофильмин сценарий өвәрц. Энүг Сталинградск дәәлдәнд орлцсн салдснрин келврмүдәс болн тодлврмудас тогтав. Фильмд цугнь дәәнә цагин предметмуд — автомобильмуд, газет, тәмк чигн тер цага болжана. Федор Комаровин келсәр, дәәнәд яһж диилвр бәрснә тускар чик кевәр медүлхд иим кино цокж авх кергтә. Кино хәләснә хөөн нүднәснь нульсмн һарв гиж дәәнә ветеран Федор Комаров келнә. Догшн дән чик кевәр үзүлгдж гиж эн темдглв. Өдгә цагин әмтнд Сталинградск дәәлдәнә тууж иим фильмин нилчәр өөрхн болх.

Фильмин режиссер Федор Бондарчукин келсәр, ода нарта-делкәд зәрм әмтн догшн дәәг американцр шүүж гиж тоолна. Зуг Һазадын ордудын медрлтә әмтн Әрәсән болн Сталинградын чинрин тускар меднә. Һазадын ордудт иим кино күн цокж авшго. Ээнь мана керг. Әмтнд эн киноһар юм герчлхәр седсн угавидн. Догшн дәәлдәг чик кевәр үзүлх кергтә. Фильмиг орчулһн угаһар әмтн медх.

Фильм цокж авхин төлә һучн сай доллар һарв. Шалһачнрин тааврар, Федор Бондарчукин цокж авсн кинофильм Әрәсән кинотеатрт хамгин олн әмтн ирж хәләх. Америкин киноакадемь болхла “Сталинград” нертә фильмиг “Оскар” мөрән марһанд орулв. Тегәд Әрәсән фильм нарта делкән кинематографин һол мөрә шүүж авхар дөрлдх.

Елена Алексенко, Котина Валерий