Шүлкә гемәс саглулһн кегджәнә
Өмн үзгин болн Ар Кавказин федеральн округст шүлкә гемин халхар хурц бәәдл тогтв. Хальмгин Ик-Буурла, Приютненск болн Хар Һазра райодт харлһна карантинн постмуд тәвгдв. Энд малын эмчнр болн ГИББД-н көдләчнр өдр-сө уга гилтә дежурств кежәнә. Иим постмуд бүрдәхин төлә танһчин бюджетас мөнгн йилһж өггдв.
Танһчин государственн ветеринарн инспектор Виктор Санджиевла Хар Һазра район телефоһар күүнджәнә. Харлһна карантин постмуд зерг һурвн районд бүрдәгдв. Комсомольский селәнәс зәнглсәр, цуг кергтә керг-үүлдврмүд күцәгдв. Энүнә хөөн Приютное селәнлә залһлда бәрв. Санджевин келсәр, мобильн залһлдан сән дөн болжана. Сүл цагт шүлкә гемин вирус уга бәәсмн, хам-хоша бәәх регионмудт нег чигн иим гемәр гемтсн йовдл илткгдсн уга. Сүл дәкж Хальмг танһчд шүлкә гемм найн тавгдгч жилд илткгдв. Африканск маальг гемин хөөн, хальмгин ветеринармуд ик урдань белдвр кесмн.
Үлгүрнь, Буденновск машзаводт малын эмчнр өдр-сө уга дежурств кехин төлә вагончик хулдж авла. Энүнд дөрвн өрн бәәнә, хот уудг ширә бас бәәнә. Тегәд энд көдлжәх ветеринармудт халун өдрмүдт невчк амр болх. Санитарн некврәр, дезинфекционн барьер утдан нәәмн метр болх зөвтә. Эннь бас учрта. Юнгад гихлә нааран орсн машина төгәс бүклдән эргх зөвтә гиж государственн ах ветеринарн инспектор цәәлһвр кев. Солом элснлә негдүлнә хөөн шишлн дезинфекционн усар эд-бод кегднә. Энүг өрәл час болад сольх кергтә.
Государственн ветеринарн ах инспектор Виктор Санджиевин келсәр, хаалһсин темдгүд ямаран һазрт тәвхин тускар ГИББД-н көдләчнрлә болн правительствла зөвшәргдв. Ода һурвн зун минһн толһа бод малд гетлүлгч тәрлһн кегдв. Ода Карачево-Черкессин дөрвн селәнд иим пункт бәәнә. Дәкәд нег иим пункт Краснодарск крайин Мостовск районд көдлжәнә.
Хальмг танһчин теегәр давж йовжах ик аца зөдг машидын жолачнрин келсәр, танһчин ветеринарн церглт азр болзгт цуг кергтә саглулгч керг-үүлдврмүд күцәжәнә. Вадим Гайдуков хам-хоша бәәх регионас ирж йовна. Зууһарн иим дөврн пост давж аһрв гиж эн келнә. Ода минеральн ус Саратовск областьд күргж йовна.
Вадим Гайдуковин келсәр, Ставропольск крайд нег стацнид бас иим пост давж һарх кергтә болв. Иим гетлүлгч керг сән ашта болх зөвтә.
Тер мет шүлкә гемм илткгдсн һазрас ирнс жолачнрла харһад күүндх саам учрв. Кабардино-Балкаряс ирсн маши залачнрин келсәр, эднә республик иим постмуд ик кезәнәс авн көдлжәнә.
Ода мана танһчд шүлкә гемлә ноолда кех эм бәәнә. Мал һарһлһна предприятьмудт болн малын арс хадһлжах һазрт ветеринарн санитарн зокал яһж күцәгджәхнь бүрткж хәләгджәнә. Тер мет иим бүртклһн карантинн постмудт кегджәнә.
Хальмг танһчин ветеринарн заллтин әнгин ах специалист Санл Пюрбеевин келсәр, мана танһчас мал зөөж һарһлһна болн нааран орулһна халх бүрткж хәләх төр тәвгджәнә. Шишлнг цаасн угаһар мал зөөгднә. Тер мет һахас авчя һарлһна төрт оньг өггдх. Эннь бас учрта, юнгад гихлә, мана танһч мал өсклһнә халхар үүлджәнә. Шүлкә геми мал тархана. Тегәд Карачаево-Черкессьт болн Краснодарск крайд карантин төгстл иим постмуд мана танһчд көдлх гиж Пюрбеев темдглв.
Шүлкә гемин туск төр танһчин правительствин бүртклһнд бәәнә. Шишлнг постмуд бүрдәхин төлә танһчин бюджетас һурвн зун минһн арслнг йилһж өггдв. Ветеринарн инспектор Виктор Санджиевин келсәр, теегин хаалһс бүрткхин төлә мобильг багмуд көдлх. Энүнә ханьд малын эмч, ветеринарн инспектор болн хаалһин полицин көдләч орх.
Батан Санжирма, Мятежный Максим
