Шидр Хальмгин ик сурһулин номтнр хальмг келнә дегтр барас һарһв

Өдгә цагт хальмг кел дасхлһнд онц оньг өггджәнә. Мана танһчд кесг керг-үүлдврмүд, харһлтс, номин сүүр давулна, эрдм-сурһулин программс бүрдәгдсн бәәнә. Шидр Хальмгин ик сурһулин номтнр хальмг келнә дегтр барас һарһв.

Хальмгин государственн университетд арвн минһн һар оютнр ном дасчана. Эдн бухгалтерин, юристин, инженерин, багшин, биологин болн нань талдан эрдм-сурһуль дасч авцхана. Хальмг келн-бичгин болн дорд үзг шинжлтин институтд баһчуд төрскн келнә болн литературин эрдм дасчана. Энд көдлжәх номтнр хальмг келндән хару улс болсн деерән, эврәннь оютнртан да3гин күцц кевәр ном заахар шунна. Тегәд һурвн жил хооран университетин проректор Владимир Имеев, профессор Роза Харчевникова, доцентнр Дарина Гедеева болн Людмила Лиджиева хальмг келнә шин дегтр үүдәхин төлә экләд көдлв.

Университетин проректор Владимир Имеевин келсәр, эн дегтр бичхләрн эдн кесг материал цуглулж авв. Шин дегтрт зуг грамматик, лексик биш, кесг соньн тоот умшж авч болх. Келхд, дегтрин түүрвәчнр шишлн диск бас һарһв.

Эн дегтр оютнрт, сурһульчнрт болн багшнрт туста болх. Күн болһн эн дегтрәр хальмг кел дасч авч чаджана.

Эн дегтрәр Сергей Артаев зуг оютнриг биш, Элст балһснд бәәх цутхлн хурлд хальмг келнә кичәлмдүдт ирсн улсиг дасхна. Энүнә келсәр, дегтрин гүн медрлтә болн ик дамшлтта түүрвәчнрин нилчәр, мана танһчд хальмг келиг олн улс дасч авх.

Оютнрт бас эн дегтрәр давулддг кичәлмүд соньн болж медгднә. 1-гч курсин оютн Аюка Эрднеевин келсәр, эн дегтр школд сурчасн учебникүдәс амр. Цуг бичсн тоот баһчудт медж авхд амр болна.

Ода болхла эн номтнр дегтрин хойрдгч боть бичжәнә. Эннь болхла, ах курсын оютнрт сурһульднь туслхнь лавта.

Шаран Баира, Колдан Церн