Расул Гамзатовин болн Көглтин Даван иньглтд нерәдгдсн үүдәлтин асхн болв
Амр Санана нертә келн-улсин библиотект хойр алдр шүлгчнрин Расул Гамзатовин болн Көглтин Даван иньглтд нерәдгдсн үүдәгч асхн болв. Энүнә шүлгләнд дурта әмтн, сурһульчнр болн бичәчнр ирж орлцв.
Хойр шүлгчин иньглт йир бат бәәсмн. Көглтин Дава эврәннь нәәжин үрврәр кесг дәкж Дагестанд одсн билә, Расул Гамзатовиг болхла Хальмг танһчд күндтә гиж тосдг бәәсмн. Үддәгч асхнд үг келсн улсин тоолврар, иим харһлтс оньдин шүлгләнә мартгдшго байрт хүврдг билә. Эврәннь үүдәлтдән Расул Гамзатов эврәннь нег һазра улсин оюни сәәхн занг-авьяс үзүлсн деерән, цуг күмни әмтнә тускар бичж медүлв. Энүгәрн шлүгчин үүдәлт талдан бичәчнрәс йилһрнә.
Расул Гамзатовин шүлгүд дуунд орсмн. Тер тоод олн улст таасгдсн “Исчезли солнечные дни” нертә дун. Тер мет алдр шүлгч аварск келнд Пушкина, Лермонтовин, Некрасовин үүдәврмүд орчулсмн. Үүдәлтин асхна йовудт сурһульчнр Гамзатовин шүлгүдиг энүнә төрскн келвәр умшв.
Дагестана олн-әмтнә шүлгч Расул Гамзатовин йирн жилин өөнин программар Амр Санана нертә библиотект алдр шүлгчин жирһлин хаалһд болн үүдәлтд нерәдгдсн “Колесо жизни” нертә литературн-көгжмин асхн бүрдәж давулгдв. Онц темдглхд, Көглтин Даван библиотекнь энүнә үлдәсн герәсәр Хальмгин государственн универистетин номин сангд орулж өггдв. Олн дегтрмүд дунд Гамзатовин һар тәвсн дегтрмүд бас бәәнә. Библиотекин көдләч Галина Сармашеван келсәр, хойр алдр шүлгч үнтә байн зөөр дорас өсж йовх баһчудт үлдәв.
Амр Санана нертә библиотекин әнгин һардач Галина Сармашеван келсәр, Көглтин Даван болн Расул Гамзатовин үүдәлтд дурна, бәәдл-жирһлд оюни чинр зүүлһнә төрмүд онц орм эзлжәнә. Эн төрмүд хойр нертә шүлгчиг негдүлнә.
Литературин халхар ик күцәмж бәрсн төләд Расул Гамзатов олн-зүсн өөдән ачлврмудар ачлгдсмн, тер тоод ССоветск Союзин болн нарта-делкән күндтә нер зүүв, мөрәһәр ачлгдла. Келхд, хойр минһн арвн һурвдгч жил Дагестанд Расул Гамзатовин жил гиж зарлгдв.
Ээнән Делгр, Очра Сергей
